شعر جميل بالعامية السودانية بالحيل أ جني أي والله

إهـداء خاص لمحبي الاستماع للشعر وفن الالقاء
والشعر الشعبي السوداني الجميل

أستــمـع مـن هنــا

القاء رائع وشعر اروع تحس بى الخيرفى السودان لسه
مفنع سابل وينو بلقاهووطرفا ذابل وين بلقاهو وعين بتدنقر من واليهن
اوين الاعمال دى هسى من مكتبة تلفزيون السودان (واظن ده ماينفع الناس فلم لا يبقى)
عمل جد رائع

الاخت توتة أشكرك على التعليق وإعجابك بكلماتها واهدي ليك القصيدة

أنا أخو البت اللكعت قرن الخمرة النازة
على وردان الصبوة الراكزة
الجنيات الهازة ..
صدورن لازة
ورقّ النص زي خيت الشلة

بالحيل آ جني إيه والله

الجنيات الحزمو الجبة
وعرق الشتوي عليهم نايا و صب
قول ما دل ..
رجالا حصدوا الحبة
عيشهن هادو انكال واتعبّ
ومنو كتير في الواطا انكبّ
وباقي مصوبر واقف قبة
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكال .. عزام .. حلاف... ضياف
الرزق الجانا مدلة..
الحلق الجاف اتبلة

بالحيل آ جني إيه والله

الوادي الجانا مترقن
مدّ جناحو الطايل شرقا وغربا
القبلي بروقو على القلعات يضّربن
الدكن البعدن قربن
فوق صنقور المحلة الطالت كبن
قول للمحلة بيوتك خربن
قول ما دلة..
الحلق الجاف اتبلّ

بالحيل آ جني إيه والله

مرحاتنا شرابهن يوت ماغبن
شبعانات في الشقل أب شوك ما شبن
الحمل ولدن وربن
حلماتن تقلن..
جرّن..
فوق سيقانن كبن
اللبن العاتم في ضرعاتن جبّن
المغصة إن كان ضرعاتن خربن
القرعة آ وليد .. السعن آ بنية
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرملة
ناس البندر لبن الشاي بالعملة

سمح الخمج الفوق أسيادو
سمح العز المن أجدادو
الجنيات المشو ما عادو
كان بالردة أكان اتنادو
غرب حامد وشرق بلة
كانوا بحلبو الضرع الدلة
كانوا بحضرو الخير القدحو معلا
الجنيات ما كفرت بنعمة الله

بالحيل آ جني إيه والله

ذات في يوم والغيمة تهتّف مطرا نقّع
فوق نوار الطلح الفقع
ريحة البرد إن جاتك عطرا فايت خمر الفوق أردافا مجضع
شفنا الوادي يقشقش في دمعات الليل
والتعل الشايل بدا يتفقع

تلب حامد فوق مخلوفة أب زور واتربع
طلق الرسن أب زمة وسوّا خبيبا بدّع
هوّد في رقّاب الصي
لا قوه ثلاثة زبيدية
خالفين سيقانن فوق السنكيت
ورقاب ألبل بيناتن مرخية
محجوبات بالخرز الفصلو السوميت
كل واحد درقة وسيف وطبنجية
وباقي جرابن مليان دلميت
الجنيات اتقبلو وضاقو الحارة
وضاقو المرة
وكان حجازن صقر الجو
حامد كان عارفين ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دلة
ولدا ما ختالن زلة
شن قولك فيهو عليك الله

بالحيل آ جني إيه والله

وينا مراتع الدرت الباسط
دايما ببكي عليهن
وين بنوت الحلة البكّر
عصرا بدري يسون في شاهيهن
بعد الليل ما يهّود ونحن نهّود..
عاد أماتن ينادن ليهن
نمشي على القيزان نتقادم..
أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنة اللهج السكر وين بلقاهو
بنات الريل الدوب ليهن
الخوف يا ناس
كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعين بتدنقر من واليهن
الوجنات الشعّن بقّن
ود العين النايم زرقن
مو زايغ رسيان وميقّن
زولن كان خدران ومحقّن
من الشوفة عروقو يطقّن
كان الدنيا بصح تتخلا
كن بركن معاهن فوق رملاة الحلة
الا كمان بنشوفا مذلة
الجنيات الغابت جابت
إنت الجيب بس قايلو قميص افرنجي وكرتونات كرملّة
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداوو العلة
الولد الجايس حقايب سفرو تقال..
تقال من جنس كتاب ومجلة
الحكمة النضم إياهو الكان..
الحكمة الولد اتوضا وصلّ
عادة البلد الدخلت فيهم سكنت ..
سكنت ماب تتخلا
نحن كما طارين الحلة ودرنا الطلة
نشيلا معاهم فرح وميتة
حلاة الموت كان في عبدلة

الاخ والصديق ابو الزهور دايما انت في حالة اتحا ف لنا بقلمك النبيل الراقي الذي ينتق لنا اجمل الاشياء واروعها فا نت سيد الروعة وسيد الكلمة المؤثرة صا حبة الصدي لك من كل التحية يا صديق وكل الود والشكر علي ما بذلته وما تبذله في هذا المنتدي الذي جمعت فيه كل ابناء بلدك واهلك فلك التحية اخي ابو الزهور وادخلك الله في خير الحديث الشريف الذي يقول من سن سنة حسنة له اجرها واجر من عمل بها الي يوم القيامة مشكور علي عرض هذا الشعر الجميل اخي ابو زهرة تسلم يا حبيب

اشكرك كتير يا ابو الزهور على اختيارك لهذة القصيدة الرائعة للمبدع الدكتور ود بادى
وهل تصدق اخى زاهر بانى استمعت لهذه القصيدة من ود بادى شخصيا بالنادى السودانى بابوظبى سنة 88 ثم امتلكت شريط كاسيت يحمل القائه لعدد من قصائدة ولكنى فقدته بكل اسف

وللمعلومة هذا الشاعر الذى ينظم دررا من القوافى الموغلة فى البداوة و الشعبية او بلغتنا (العكودية) هل تعلم انه دكتور طبيب ... فما اعجبه استطاع ان يجمع بين علم الطب والابداع الادبى
اطمع ان يرسل لى مديرنا كل قصايده على الايميل الخاص فهلا استجاب مشكورا

الاخ هـشام حمـزة دائما أجدك حيث الروعـة يا رائع تسلم
لقيت لي شباب يتذوق الشعر العامي ايضاً

أشكرك على الحديث الطيب الذي ينم عن طيب اصلك ودواخلك وشفافيتك بجانب ذوقك الرفيع .

مرحبات بيك ومرورك اسعـدني ويدعمني كثيراً ..

العزيز ابو الزهور مشكور علي الرد المتواضع الجميل لكن اظنك ملخبت بين وبين ابن الخالة هاشم ما عارف غلطة حرف ولا سهوة ولف للاخ هاشم طبعا ابن الخالة هاشم حقيقة هو بشد العقل والقلب بصفاته وادبه الجم وهدؤه المعروف ودة بالاضافة انو ود جيرانكم هاهاهاهاهاهاهاهاهاهاهاهاهاهاهاهاها علي العموم ما مشيت بعيد زيتنة في بيتنة التحية لك ومن هنا احي اخي وصديق وابن الخالة الغالي الاستاذ هاشم احمد الشيخ ادريس له من كل الحب والتقدير والاحترام

أخي الغـالي ضرغـام

ههههههههههههه دائما تضحكني عكـودية حلووووووو التعريف الجديد

أكيد لطاما سمعتها من صاحبها وسمع الكلام في خشم سيده
وأيضـاً ليس من سمع كمن رأي

بجلوسكم مع الشاعر في ندواته قد يكون له مذاق وطعم خـاص , فأنا كنت لا أعرف الشاعر / حسن الدابي لكن حضرت له أمسية واستمعت واستمتعت لقصـائده جعلتني اتلهف لقصائده ..

هذا نفس شعـورك وانت عشقت كلمات الشاعر المبدع الدكتور / ود بادي

أما طلبـك ....

سعـة ورحبـا وحديثك عن الشـاعر ومتابعتي لهذه المادة المسجلة صورة وصوت وميولي الشديد للشعـر اشعـلت في روح الحمـاس لابس عن كاست في تسجيلات شاعرنا الرائع الدكتور / ود بادي . وتاكد غذا حصلت على الكاست سـاخصص لك نسخـه حتى تشاركني الاستمتاع بالاستماع إليه .

سارسل ليك القصائد هنا وهناك

لا والله يا هشام صلحتها قبل ما ارجع لي كلامك ده

عندي مشكلة في تقديم الحروف من الاستعجال

خطأ مطبعـي

ألتمس لي العذر فيه والراس ملخبط

اهـداء للاخوان هشـام حمـزة
والاخ ضـرغـام

وما ننسـى الاخت توتة

هوى يا وليد يا دلوعة يا مرنوعة
أعدل إيدك المفدوعةواتلحلح
واقيف دغرى وواس صدرك
مع صدرى واتشدّع

ليك الحق ..........!!!!
شان ولدوك فوق اسفنج
وحتى أول جديد سوهو ليك بالبنج
وهسع هوايتك إنك تلعب البنق بونق
وليك الحق عشان فطموك
بعد مازدتا فوق سنتين
وفى سن عشرة نومك كان على الليدين
غطاك بالشاش وفرشك بيحرير الصين
والبتدورو كلو بتلقى غاب قوسين
ابوك مليان وجيبو سمين وقلبو سمين
وفاتحلك حساب فى البنك والتأمين

وليك الحق...........!!!!!!!!!!
عشان ما خضتا فى وحل المطر والطين
ومن الترعة ما سويت شراب الهين
وما قيلتا فى ضل دومة بى فرعين
وما شاققتا عرق النيل مع الوزين

وليك الحق........!!!!!
عشان ادمنتا عيشة اللين
مشي الاسفلت ما جربتو بالكرعين
ركوب اللورى فى شمساً تصر العين
وما عانيت وقوف الصف وراء التموين
عشان يا انتى ما بتدرى سجل ابواتك البدرى

دحين اسمع .. أقيف واسمع
سماك الباكى مجدو الزال
يا ما كانوا تحتوا رجال
ابوخنجر وابوشوتال
والصقر البجيك خوجال
صوتن كان يمين جلجال
ومكسيين كمال وجلال
لكن الزمن اسرع
سيفن بلحس الفقره
وما كان برضو بالحقرة
وكانوا بضبحوا الشقره
وكانوا بضوقو العادوه نوم الكوع
وكانوا بموتوا فى شان حرمة المفزوع

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

هوى يا وليد
حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ
فى جبال النقعة زى الصور
والحصحاص يجرفوا السيل
يكنسوا على مهاوى الخور
وقلب الصاقعة يتطرقش
يكب النار دمار وشرور
وشفتا الحال عرق مقلوع
جبل متروم فرع مكسور
جمال غرقانة بى حالا
وحد المويه فى الغرغور
ود ابن ادم المسكين
نجاتو تحت قرون التور
والعوتيب يجيك يجرى
يشيلك وانتى ما بتدرى
وما بيرفع

هوى يا وليد ...
حصل سادرتا بالديداب
وقدامك مراحك وراكب الخباب
ودربك طولوا يملا العين
سحاب وغبار ومويتو سراب
وهوى كرباجك البكاى
يبكى على ضهور الضمر الانجاب
وتسرى الليل وما تضوق هجدة
لو كان النجم ما غاب
وبعد أيام تجيك لفته
ويلوحلك فى البوادى سحاب
وتكرف من دعاش العينة تملا رئاك
عطر وأطياب
تلقى الوادى خضر زى تقول
ماكان خراب ويباب
وبت ام ساق تقييل من ضحاها
على المعالى ونسمة الهباب
وتفرش ليك حزمة نال تحت
سيالة تريانة فروعها قراب
وتنفخ كل آهاتك مع المزمار
تصوغ الحان ملانة شباب
وتنسي الدنيا كل الدنيا
ماعندك معاها حساب
خلاف برقا يشيل حرقاص
أو رعدا تقول رصاص وكت فركع

هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى
مشتاقاً يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق
وتلقى هناك بنات بلدك ولاد بلدك
يعلو الصفقة تقدح فى القلوب الشوق
ونغم الفال ابشرن يا بنات بالخير
والجنيات تطير لا فوق
وكم زغرودة تتفجر
تفور بالناس بعد ما تروق
يعوم الوز صدورو تشابى
للمجهول وما بتضوق
تميل زينوبة زى البان
يمين وشمال تودى الطوق
واخوان ام شلخ ينكبو جوه الداره
زى صقرا نزل من فوق
ضرب الصوت والركزة بيفرق الناس
عشان زينوبة ما بتحوق
وعاد تتحزم الجنيات
وتتنظم تقيف في روق
وكل واحد يهز ضرعاتو
والحجبات تزح لافوق
جفير الخوسة فايت الكوع
وسيرو مع العضل مطبوق
والطاقية تحت الحاجب المعقود
هدية أم زين وما مشرية من السوق
ويتقدم عريس السمحة رافع صوتو
كان بسوقوا بيهو النوق
والعنجاوى ينزل فوق ضهورن
بس تقول منشحطة فيهو بروق
يبدا مجرو بالترقوة ويتحدر
مع الضلع القصار ملصوق
واحمر عين يشم الدم بعد ما يرش بنات
عمو ويزيدن شوق
وثابت حيطة لا بتهز ولا بتلز
وصارى جبينو كلو عروق
وقال بعد العقد طلقانة ما يحجزوهو
إلا يخلو ضهروا شقوق
هناك الحال مغير جد
وهيجة الناس تفوت الحد
وكان حجازو مد الليد بتسمع كع

هوى يا وليد ...
حصل شارفت دغشا بدرى
فوق حجرة مخانق النيل
فى سنة تساب والشرقي
حزم القيف وطفح الكيل
وشوفتا الهيبة فوق اسيادا
والشخرى البكتل الحيل
وشفتا الجارى يحفر
فى جروف كوكبنا
بس داير يشقو عديل
يجيك بي صدرو متحزم
ومتلقف صفوف فى صفوف
يحاكى الخيل
ومويتو الهايجة تبلع جب
وتجقم فى مدالق السيل
وفوق الرملة مشرور
العشارى طويل
معشعش بين نوايبو الطير
حليلو جزايرو جاها النيل
وحالف ما يخلى شبير
حزم اطرافا يكسر فيها
بالهدام وينحر فيها بالقرقير
وبكرة يموصها يشرب طينها
يزرع فيها شلالات هدير وهدير
وتكسح مركب النواتة عايمى
على قرون الموج جناحها كسير
رواسيها مالى اصابعوا فى المجداف
يقوم لافوق ويجى من تانى فوق الدفة
رافع ايدو ينده فى جملة الصلاح واهل الخير
هناك الموت يمين شافوهو شوف العين
ومافى شفيع ومافى مجير
تقول الزول يعرف اجلو
ومكان موتو لولا إنو
ما كشفو الإله لى غير

شن فضل بلا الغرق البدور ناعى
وفعلا كانوا يا هو مصير
ومشيت المركب الغرقاني بين موجتين
طفروا منها النواتا بطن اللجّة قالوا اخير
تماسيحاً يقالدوا الموج يصارعوا
عتاوة العرق الكتالو مرير
ساعة يعومو بالضرعات وساعة فج
صدورن ضمة مااتبلت ولو قطير
ديل يا وليد ولاد النيل
رضو الهيجة من صدروا
ومن الطيبة رضعوا كتير
الواحد فعايلو كتر ونضمو دقاق
نهرتوا يمين تسوى الفاق
ومراً أصلاً لا ضاقوه لا بنضاق
كفاك يا وليد بلاش فاقة
خلاص أنا تهتا فى الاشواق وما برجع
وهسع ضمة لا شايفك ولا بسمع .

االاخ المدير العام لا املك ال الاعجاب بالكلمات الرائعة دى وبكل ما تحمل من كبرياء وعزة انسان بلدى

الجعلى اب شرابا حار وقالوا بعدى يومو خنق
والشايقى البياكل النار وفوقو نحاسو متخنق
ودرفون البجا الصقار وحاقب سيفوا ياكل الشق
والغرباوى عينو شرار وكضب القالوا عندو عرق
والنيلى البعرفوا كتار على كتل الأسود جرّق
والبطحانى والشكرى وغيرهم من أهل فخرى
ومنهم أصلى لا بشبع ولا بقنع

الاخت توتة أشكرك على المرور وأقول ليك

حصل جربتي

حصل جربتا كب السارية
فى القلعة وخلا العتمور
وشفتا بروقه تترقص وتتحرقص
تقول مطويه فى قرقور
وعاوى الزيفة ينفخ
فى جبال النقعة زى الصور
والحصحاص يجرفوا السيل
يكنسوا على مهاوى الخور

ده سؤال طرحه الشاعر لنا جميعا وانا بطرحه ليك

مشكورة على المرور

اخى شيخ فرح ياريت لو كان جربت العودة للطبيعة البكر دى والله ابيات روعة بتسحبك معاها لى عالم نقى وتحس انك لمست الحصحاص والمويه
والليك كمان قصيدة الحردلو دى

-1-

تقول لِى شنو
وتقولى لِى منو ،

-2-

أنحنَا السَّاسْ
ونَحنا الرَّاسْ
ونحن الدّنيا جبناهَا
وبَنيناها..

بِويت ..فى بِويتْ
وأسْعل جدى ترهاقَا
وخلى الفَاقة .. والقَاقا

-3-

تقول لِى شنو
وتقول لِى منو ،

-4-

تَالا أبوى .. بعنخى لَزَمْ
وتَالا اللُمْ..أَبوىْ أوْلبَابْ
وأمى مهيرة بتْ عبودْ
وأخويا المهدى ..سيد السيفْ
والخلى النصارى تقيفْ
هناك ..فى القيفْ ،

-5-

تقول لِى شنو
وتقول لِى منو ،

-6-

ونحن الشينْ
ونحن الزينْ
ونحن العقبه والعتمور
ونحن القِبله .. والقرعانْ
ونحن الشانْ
ونحن النانْ
أتينا عشانْ
نسوى الدّنيا للإنسانْ
تقول لِى شنو
وتقول لِى منو ،

-8-
ونحن الصّافى
والوَافى ،
ونحن الشّافى
والكافِى ،
ونحن الزادْ
ونحن العِينه
والزِيّنه ،
ونحن – يمين – أهالينا
أهلى سرورْ
ووكَتين ينزل المستورْ
تَرَانَه النور

-9-

تقول لِى شنو
وتقول لِى منو ،

-10-

ونحن الجبنه واللبريقْ
ونحن قداحنا سَاوات ضيقْ
ونحن بيوتنا مفتوحاتْ
مَسَاىْ .. وَصباحْ
ونحن وشُوشنا
مطروحاتْ مَسَاىْ وصباحْ
ونحن السَمحه والقَمحه
ونحن الطله .. واللمحه ،
ونحن الصِيدْ
ونحن العيدْ ،

-11-

تقولى لِى شنو
وتقولى لِى منو ،

-12-

ونحن عُزَازْ
ونحن حَرَازْ
ونحن هَشَابْ
ونحن قُمُوحْ
ونحن تُمُورْ
ونحن عُيُوشْ
ونحن النيلْ
وَكضَاب – يا زويل – منْ قالْ
إنّك .. تانى لينا متيلْ ،
تقولى لِى شنو
وتقولى لِى منو ،

-13-

ونحن الحَجه والتوبه ،
ونحن الهِجره .. والأوبه ،
ونحن كُتَارْ
ونحن كُبَارْ ،
ونحن – يمين – جُمَال الشيلْ
ونحن – يمين –نَضِمنا قليلْ ،

-14-

تقول لِى شنو
وتقول لِى منو ،

-15-

ونحن مِحايه
نحن طِرايه
نحن فِدايه
نحن سِمايه
نحن حجاب
ونحن اللوحْ
ونحن شَرَافه فى الدنيا
ونحن كِتاب عِلمْ مفتوحْ
على كل البُلودات ..نُورْ ،
ونحن – يمين – مَداين نورْ ،
ووشنا نورْ ،

-16-

تقول لِى شنو
وتقول لِى منو ،

-17-

ونحن الحِنه والجرتقْ
ونحن الزفه والسيره ،
ونحن ..أبشرى والشبال ،
ونحن السَىْ
ونحن الوَىْ
ونحن الرقبه .. والتُمْ تُمْ
ونحن اللَمْ ..
يكون فى الدنيا ..متلنا ..لمْ

-18-

تقولى لِى شنو
وتقول لِى منو ،

-19-
ونحن العَاجْ
ونحن الصَاجْ
ونحن البوشْ
ونحن الحوشْ
ونحن الناسْ
وكتين الديارا ..يباس
وإن درت العديل والزين
تعال يا زول ،
وإن كست الكعب والشين
أرح .. يا زول

-20-

تقولى لى شنو
وتقول لى منو ،

-21-

ونحن السورْ
ونحن الحُورْ ،
ونحن بناتنا محروساتْ
ونحن وِلادنا ضُلالاتْ
ونحن أُماتنا ياهِنْ ..ديلْ ،
وجِيب ورينى زيىِّ منو ،
وتقول لِى شنو
وتقول لِى منو ،

-22-

ونحن فَزَعْ
ونحن وجَعْ
ونحن اليُمه ..واليَابَا
ونحن أريتو بالتَابَه ،
ونحن – يمين – إذا حَرّتْ ،
نخلى الواطه ..رُقَابه ،

-23-

تقولى لِى شنو
وتقولى لِى منو ،

-24-

ونحن زَغَاوه والعطرونْ
ونحن الدُونَا ..مافيشُ دونُ
ونحن وِلاد مَلك خِرتيتْ
وسَابَ الجرْ
وحجَر السِكه ،
والتاكا ،
وسيّدنا الفى الجبل ..دَاكَا
ونحن – يمين – نضِمنا كُتُرْ
وشيَتنا كُتُرْ
وأسعَل ناس كَرن والطُورْ ،
وأسعَل كَررى .. والعَتْمُورْ
وأسعل – يا جنَاَ – الخرتُومْ ،
وشوف كيفن زعلنا كُتُرْ ،
وشوف كيفن فرحنا كُتُرْ ،
أنحنا الـ للرجال خُوسَه ،
ونحن –يمين – جِنَات موسى ،

-25-

تقولى لِى شنو
وتقول لِى منو ،

-26-

ونحن الدوكه
والضُلاله ، والدونكه ،
ونحن الدانقه ،
والراكوبه ، والواطه ،
ونحن الفَكَه والشِبكَه
ونحن الحجزه .. والعكَه ،
ونحن الجُودْ ،
ونحن أسودْ ،
ونحن النَانْ ،
حديثنا إذا أرِدتو رُطَانْ
وحين دايرين ..نسوى بَيَانْ ،

-27-

تقول لِى شنو
وتقول لِى منو ،

-28-

ونحن الخَلوهَ والدايره ،
ونحن تَكيه العايره ،
ونحن الضُّلْ ،
ونحن الكُلْ ،
ونحن سبيل غريب الليلْ ،
ونحن صباح مسافر الليلْ ،
ونحن فَنَاجرةَ الدّنيا ،
ونحن حَبَابْ
حديثنا حَبَابْ
تعال شَرِف .. وشوفنى منو ،
وتقولِى شنو ،
وتقولِى منو ،

-29-

أقيف لِسَعْ
وأقيف وأسمعْ ،
ونحن صديرى منضوم ويلْ
ونحن القَرمصيص ..بلحيلْ ،
ونحن التوبْ
ونحن الووبْ
وناس حبوبْ
وناس حَرّمْ
ونحن إذا رأينا كبيرْ
نقيف طولنا ..ونقولْ لُه ..حَبَابْ
ونديه البُكَان ..ترحابْ
ونحن. اليَانَا ديل .. يا زولْ
وتسعلنى .. وتقول لِى منو
وتقولِى شنو ،

-30-
أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه

-31-

تقول لِى شنو
وتقول لِى منو ،

-32-

وأما عجيبْ
وأما غريبْ ،
وأقيف لسعْ
وأقيف .. وأسمعْ ،

-33-

أنا الكَعَب البسوى الويلْ
وأنا الزول السَمِحْ ..بلحيل ،
وداير ..منَِّهُمْ .. يَاتُو ..،
تقولى لِى شنو

وتقول لِى منو

أحسنتي الاختيار ما زلت احتفظ بيها في الجهاز عندي هي وقصيدة يا يمة رسلي لي عفوّك ينجيني من جور الزمان

وكنت في صغري أرددها كثيرا بتاعة الحردلوا متعه الله بالصحـة تقول لي شنو وتقولي منو

أقيف لسعْ
وأقيف .. وأسمعْ
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه

يا سلاااااااااام على الحليفة حرم مع الكرم
( حرّم أ زول تجي جاي وما تقول حاجة تب )

والحليفة في المواصلات حرّم ما تدفع انا دفعت ليه يا ولد يا كمساري ما تاخد من الولية توتة دي حقها مدفوع

وتقوم توته بصوت مليان بالشكر والحشمة هي مالك مكلف نفسك انا القروش معاي بارك الله فيك وكتر خيرك

أشكرك على القصيدة مرة أخرى

وشكرا ليك ياشيخ فرح على حق المواصلات
ويبقى فينا الكرم السودانى وتبقى فينا العزة والكبرياء رغم تقلب القلوب والزمان

والله الف شكر ليكم الاخ المدير العام والاخت توتة علي هذا المجهود الطيب والحمد لله ان هذا المنتدي قد

كشف لنا عن مستويات عالية جدا ومشرفة من ابناء البلد وكمان بنات البلد ولقد عرفنة الملكات الا دبية

والشعرية والمستويات الرفيعة المخفية في مجتمعنا وهذا فخر كبير جدا لنا جميعنا ابناء الدبيبة والي الاما م

ودايرين نشوف كمان اكتر تقبل مروري الاخ ابو الزهور والاخت توتة

مرورك يسعدنا أخي هشـااااام حمـزة الليلة السـوق ههههههههههههه

والجايات أحلـى

خليك قريب