امى........دفقات من الطيبة والحنان ترقد فى قبر

لم اكتب يوم عيد الام ولم اشارك لاننى لااعلم اين اذهب بهديتى ....لم ادخل البوستات المعنونة الى الام
لانى لااستطيع ان اغالب دمعتى.....لااود ان افسد فرحة الفرحانين بآمهاتهم....تجولت هنا وهناك ولم اكن شجاعا
لاقول كل سنة وانت طيبة يا امى
انا اعلم انك بين يدى ارحم الرحمين....لذلك ارسل لك هديتى صباحا ومساء فى صندوق بريد السماء ليس بيننا وبينه
حجاب بث مباشر....فاتحتى ودعواتى والاعتراف بتقصيرى...ضآلتى ...امام عظمتك.......قسوتى.....قصاد...حنيتك
جحودى........تجاه.......حبك....
لم اكن ادرى انى احبك كل هذا الحب الا حين افتقدتك.......كنت اعيش حبك لى قصة ريد عظيمة لم يكتبها الشعراء
ولم تخطر على بال الادباء.....
اذكر وانا صغير......تنادينى تعال ياحبر ....امش شيل الصينيه دى وديها ناس خالتك فلانة او ناس عمتك فلانة
اطنطن من المرسال ...لكن لما اصل ناس خالتى او عمتى....
يفرحوا بالصينية التى لم يكن بها سوى كسرة وملاح وانا صغير عاجز عن الادراك.......لكننى افهم اليوم ان الانسانية هى انت....لا الاغاثة ولا الصليب الاحمر ولا المنظمات.....
انت التوادد....والتراحم....العطف على المسكين.....الشفقه على الفقير ..بلا من ..ولا اذى ..فآتعلم ولكن متآخر
يحضر ابى من الخرطوم.......تعال ياحبر شيل الكيس دة وديهو ناس فلانة.....قبيل فى الجزر...شفت اللحمة
كملت عليها.....والكيس ليس فيه الكثير....حبة لحمة وموزات....وبرتكانتين وليمونات وشوية بامية......
لكن خالتى اوعمتى فلانة تفرح غاية الفرح .....هى يا الله امك يديها الخير ...ايضا لاافهم زمان
لكن حينما تتسع الرؤية....ادرك كم هى عظيمة.....تلك المرآة الامية.....
امى.........................احبك..............يامى
تواصل

زكريات حزينه قراتها وانفاضت دموعي وانت دائما
مبدع في الكتابه وربنا يرحم الوالده بقدر ما قدمت
من خيرويرحم جميع امهات المسلمين.

تسلم ابو امنة وتسلم الوالدة بروهن برا بوالدتك....البر..عليك باقدامها فتحتها الجنة......

الام مدرسة إذا اعدتها إعدت شعب طيب ألأعراق
مشكور الاخ الاكبر الحبر والا رحم الله الوالدة واسكنهافسيح جناته مع الصديقين والشهداء واحفظ كل امهات المسلمين .....

الحاجة ..فاطمة احمد محمد بدر...الشهيرة(فطينة) يصدق فيها قول ادريس جماع.............

.....هين..تستخفه...بسمة...الطفل............... قوى..يصارع..الاجيالا..

...حاسر..الرآس..عند كل..جمال...............مستشف..من كل..جمال..جمالا..

كانت هينة لينة كالنسمة الرقيقة...عطرت حياتنا بكل طيب ..ومضت..كالحلم الجميل..تتمنى لو لم تصحو من النوم

رحلت الغللية بعدما ادت رسالتها فى الحياة ينطبق عليها معنى الحديث الشريف.........

ليس المؤمن بصخاب ولا لعان ولا فاحش ولا بذىء......او كما قال صلى الله عليه وسلم

تسآلنى مرة انت يا الحبر بتقرآ شنو فى الجامعة...وناسنا بيعرفوا ..يا مهتدس او دكتور تانى مافى قراية

قلت ليها انا بقرآ فلسفة...قالت فلسفة شنى السايب عليها,,يعنى تطلع متفلسف وبتدور بيها شنو اقولو متفلسف

الشى دى ( نبذ)

قلت اتجدع شوية فى الحاجة واديها ليك من التقيل عشان تآمن ذاتو الفلسفة دى شنو عوجت ليك خشمى قلت ليها

ياحاجة سمعت بى رينيه ديكارت قال شنو؟؟؟؟؟ قالت لى قال ى شنو

قلت ليها ى دة عشان يثبت الله(سبحانه وتعالى)موجود....اثبت اول شىء انو هو موجود..وقال انا افكر اذن انا موجود

وقعدت اشرح ليها فى نظرية ديكارت... قالت لى هى سجم خشمك انت وزولك دة كان ما غبيانين...الله بدور لو دليل

......الله..الله على الايمان الفطرى ايمان العجائز كما قال افضل الخلق عليه الصلاة والتسليم..آفحمت واسقط فى يدى

فلم ادرى ما اقول.............كنت اود ان احدثها عن هيجل.... والمطلق....وعن...كيركيجورد والوجودية وعن رسل ونظرياته الرياضية....لكنى لم

استطع.........ونواصل..........

.

شكرا الاخ خالد ديش والتحية لكل الامهات ربنا يديهن الصحة والعافية مبروك الاقامة وتحياتى لعمى الشيخ

رحم الله الوالده فطينه جلسنا معها
منذ طفولتنا فلم نسمع منها الا الكلمه الطيبه
والدعاء لنا بالنجاح والتوفيق في حياتنا فحقا
هي ام قل ما توجد في هذا الزمان وانت يا شيخ
الحبر حفظك الله ابدعت وتجليت في كل موضوع
تطرقت له ف سر وعين الله ترعاك

شكرا اختى الغالية بنت ابو فركة وياحليل ايام الحاجة بتدعوا ليكم انت وميرفت وصاحباتكم تلك ايام حلوة ربنا
يخلى ليك الوالدة ويديها الصحة والعافية تحياتى للعائلة الكريمة

الله يرحمها خالتنا (فطينة) كانت فعلا حنينة و الطيبة ما غريبة علي اهلنا الكبار المشو خلونا قبل ما نشبع منهم . ادخلها الله جناته الوالدة فطينة

اللهم ارحم االخاله فاطمة احمد محمد بدر(فطينه )
الجاره الحنونه
والله صورتها في زاكرتي وهي ذاهبه او قادمه من المسجد
ازيك يا خاله هي حبابك ياولدي ود عمر اخوي كيفنك

وتسال عن الصحه والاهل واحوالهم و وو

رحم الله الوالدة واسكنهافسيح جناته مع الصديقين والشهداء

شكرا ياود العمدة ربنا يتقبل دعواتكم ويخلى ليك الحاجة

ياسلام يانزار الله احفظكم وانتم اهل لحفظ حقوق الجار والارحام ويخلى الحاجة الكبيرة والحاجة الصغيرة ويحفظكم

الله ارحم الوالدة ،غاية في الحنان، بتذكر لما ما أسقي الشجر بتاع الصالون بتاعنا ما كانت بتشاكلني تقول لي ما مشكلة يا ولدي اه

اخي ابن الخال والخاله
رفقا بحالك ولطفا بنا
انفطرت اكبادنا ورقت مشاعرنا وزرفت مدامعنا
عباراتك الهبت افئدتنا,,,قرائتها وكاني اتلقي خبر نعي والدتنا الخاله فطينه الساعه
اعلم هذا هو شعورك كل لحظه..في فقد اعز عزيز
وقد اخرجت بعضا منها,,وكانها حمما تخرج من فوه بركان
واننا لا طاقه لنا بهذا
فقدنا الذي نبشت جراحه اليوم انه لعظيم وجلل
لها الرحمه والمغفره..ولوالدنا خلف الله الرحمه والمغفره
اسكنهم الله عوالي الجنان
في زمره النبين والصديقين والشهداء والصالحين وحس اولائك رفيقا
عزائنا انهم خلفوا لنا من يخلفهم بخير وجداره
اذ انهم بوجودكم معنا لم يذالوا احياء ارواحهم معنا ومعها طيب الزكريات
لا اجد ما اقول فقد اصعبت علينا التعبير وشققت علينا الخواطر
بكلماتك الحزينه الصادقه التي خرجت من قلبك وتوهطت في قلوبنا
جعلك الله لنا حبرا وقلما
دوايه ولوح
منبعا للمحنه والطيبه
وعينا للعلم والمعرفه
تنضح مجدا و كبرياء
دمت عزه وكرامه
لنا وللدبيبه
متعك الله بالصحه والعافيه وتحقيق المراد
تقبل مروري واسترسالي
دمت اخ وصديق عالي المقام ,,شامخ الذروه

امي........امي.......امي........اريد البكاء علي صدرك لانني لا استطيع البكاء بعدك
تخافين علي وتضميني فانني ابنك ولدك تبا لكل نساء العالم بعدك من يمسح الدمع عن خدي غيرك. لن ابكي امام احد بعد فراقك فاني اعيش علي كلماتك بكل معاني الحروف اشتقت لكي
اشتقت لتقبيل يدك امي........امي.........امي........رحلتي عني من الارض الي السماء
كانني اعيش في الصحراء. الرحمة والمغفرة للخالة فطينة والوالدة حقيقة كلماتك اثارت شجوني وقلبت علينا المواجع ربنا يصبرنا على فراقهم والدنيا من بعدهم مابتسر.

دلة ياحبيب اعلم تماما مشاعرك ...لكن نعمل شنو...المشاعر غلبت عيد الام حرك الوجدان....شكرا للقصيدة المنثورة
المرفقة......كلام كبار كبار شيشك......تسلم ياحبيب

عبد الناصر سلام ايوة كدة يا اخ ازرف الدموع فوالله هن يستحقن اكثر من مجرد زرف الدموع الام اغلى حاجة فى الكون........هاك الدليل
واحد من اهلنا من القرى المجاورة وهو رحم كان يزور القرية دوما وكان يذهب دكانكم طوالى الوالدة ..فاطمة دفع الله
العباس (ام كتير) عليها رحمة الله كانت تبره ......... جاء قال ليها المرة عاوزة تلد.....
الحاجة عليها رحمة الله ادتو سكر....وشاى......كيلة تمر.....وبعض الاشياء الاخرى مشى اهلو قالوا لية دة كلو جبتو
من وين قال دى ام كتير .....حرم المولود دة ...ولد ...ولا..بنت...اسمى ام كتير
ياسلام بالله شوف ....زى مابقول خالنا بركات ادم.

الهم ارحم الوالده فطيبنه رحمتا واسعه واغفر لها واكرم نزلها
الهم ابدلها دار خير من دارها واهلا خير من اهلها
وادخلها الجنه واعذها من عذاب القبر والنار

اه اه اه اه والف اه عليك يا امى لقد ابكيتنى يا خالى حتى احسست ان قلبى سينشطر الى نصفين ماذا اقول وماذا احكى وعن من ساتكلم عن امى التى كانت تحبنى حبا ما بعده حب ام احكى عن صديقتى التى كانت تسامرنى وتضحكنى بحديثها الحلو ام احكى عن حبوبتى التى كانت تغرقنى بدلالها ام احكى عن نور البيت الذى انطفاء وتركنا فى ظلام رهيب ام احكى عن طيبة بلا حدود حنية فوق الوصف كرم وكرم وكرم كان يمشى على البسيطة ام احكى عن بسمة ضحكة رقة نقاء صفاء عفوية ورجاحة عقل وراى سديد افتقدنا المشورة والبركة والوجه الصبوح احكى عن حزنى ام عن الم يعتصر فؤادى ام عن ذكريات تضرب فى جوفى فتتحسسنى بوخز عميق احكى عن ماذا عن حب ابدى احمله فى دواخلى لكى يا ماما فطينة ام احكى عن قصة الريد التى تجمعنا لن احكى ولن اقول فمهما وصفت لااستطيع الله ارحمك يا نسمة نعم نسمة فلم ارى فى حياتى ارق واحن واطيب قلب كقلبك ولم ارى بساطة وطيبة كطيبة امى فكنتى انت المرغوبة والمهيوبة فلم ارى هيبة كهيبتك لن اقول اكثر من هذا فدموعى غلبتنى

اخي الحبر وام روان تغالبني الدموع وتمنيت لو انني لم ادخل هذا البوست من نسبة الالم الذي فيه فرحم الله والدتنا فاطمه واكرمها مثل ما اكرمت وجعل كل اعمالها في ميزان حسناتها فيا شيخنا كم ابكاني قلمك فمهلا علينا حبيب الكل

تحياتي

ود الضيب صدقنى ان قلت لك اننى عندما قرأت هذا الموضوع بكيت حتى بح صوتى فكيف بك وانت ابو الحنية والقلب الرهيف اعذرنا ان جاءت كلماتنا محزنة فهذا هو حال الدنيا الفراق سمتها والالم طابعها

رحمها الله رحمة واسعة وكل امواتنا. امين يا رب.
صالح دعواتك والصدقة لها وللوالد افضل من جميع كروت المناسبات او تعبير الكلمات او او او او .. الخ.
رحم الله من رحم ومتع الباقين بالصحة والعافية.
كل الود.