القرنتيه ..

القرنتيه
****
لا دبابه برمائيه
لا جاسوسه ولا مدسوسه
لا غواصه روسيه
لا جنديه فيي
حركه لا مختلصه مال شركه
لا قصفت حدود فشلا
ولا كسرت رصيف كسلا
لا معروفه ختميه(خط ميه)
قرنتيه
لا صعلوكه لبست شورت
ولا بتعرف شنو الباسبورت
لا محتاجه جنسيه
هي قايله النيل سقف بيتا
وقايله ضفافا محميه
جات منسابه عز الصيف
قايله الناس بكرموا الضيف
وقايله النيل امان والقيف
قايله العاصمه عصريه
قرنتيه
جات بي صغارا دايره الخير
لا شافت يفط تحذير
لا نزحت تكوس توزير
لا جاطت حركة السير
لا دارت وسام تقدير
لا مستلفه عشرين وش
لا بتعرف تعيش بالغش
كان محتاجه بس للقش
جات احلاما دغريه
لا بلعت عديل السوق
ولا نضمت بدون طايوق
لا كنزت دهب او ماس
ولا ظلمت بدون احساس
ولا عصرت شباب الناس
لا كتمت علي الانفاس
لا قطعت عشم بي فاس
لا داستنا زنديه
قرنتيه
لا دست سلع في الخيش
لا شربت مريسة العيش
لا ظبطوها في التفتيش
ولا سجنوها شالوا الفيش
لا خانت قسم او جيش
لا اجتمعت بي مستر جون
لا اكلت مئونة العون
لا سدت علينا الكون
لا سبت كتاب الدين
لا سامتنا حمرة عين
ولا باعتنا ضهريه
قرنتيه
جات مشتاقه للخرطوم
تزور احبابا خايفه اللوم
تصيح وتنادي بالحلقوم
جنينة النزهه وين يازول
لقت حال الجنينه خلا
حليل زمانا وحليل اهلا
لا قرنتيه لا اصلا
لا صوت ككو لا بقلا
لا حلوف
لا اسدا مهاب بالخوف
لا نمرا يشد الشوف
ولا ضل فيل
لا تيتل جريهو جميل
ولا غزلان ولا طاوس يباهي الليل
لا زفه طيور ونعام
لا نمرا دفر قدام
كل الشله ياقرنتيه في رمشة عين
احالوهم لصالح عام
تقول الدنيا مهديه
قرنتيه
جات زي ضيفه ما غاره
لا محتاجه لي فيزا ولا تصديق علي زياره
جات والشوق دموع حاره
تجدد في العيون الشوف
بين توتي وعلايل اب روف
قايله الدنيا لسع سلام
ما خيم زمان الخوف
لسع هناك ضفاف حره
ما مطموره للمره
قايله الناس بعزوا الضيف
ما بسوقوهوا لي حفره وجوار القيف
ما بياكلوهوا في السفره
ومصيرو مخيف
قايله العاصمه ما غابه
وقايله حقوقا محميه
قرنتيه
لا قدلت في شارع القصر
لا حامت وكت الحظر
لا خشت علي المامور
ولا نطت سلك او سور
لا دخلت علي ام درمان
لا دفرت علي التلفاز
لا عضت رجل فنان
لا ذاعت بيان لي الناس
لا احتلت كمان حيشان
ولا نصبت شبك للحش
جات بي صغارا كايسه القش
تلقي القوت صبح محظور
وخير البقعه جوه السور
سماحة الدنيا منسيه
قرنتيه
لا بتعرف عجن او لخ
وجات احلاما دغريه
عجب ساقوها جوه الفخ
عجب من طولا وقعت طخ
عجب سلخوها صبحيه
ونحنا بنسلخ الانسان كيف ما نقدر الحيوان
عجب والدنيا عصريه
قرنتيه
لا دبابه برمائيه
لا جاسوسه مدسوسه
لا غواصه روسيه
لا جنديه في حركه
لا مختلسه مال شركه
لا حزبيه بعثيه
قرنتيه
***