النعجة والسواسيو

حاجة سكينة مرة قادرة ومتسلطة ولسانها طويل – الكل فى الحلة يعمل لها ألف حساب فقد عرفت بالشر واثارة المشاكل حتى رجال الحلة اعتى واحد يقف قدامها كالجرو وحجة سكينة امرأة ضخمة الجثة ذات مطارق عريضة على خديها وعيون واسعة وحمراء وصوت جهور . استغلت شكلها ذلك فى تخويف خلق الله . وهى عائشة لوحدها لازوج لا قريب ، فقط بعض من الاغنام وكمية من الدجاج. كانت إذا خرجت لورود الماء من الكرجاكة الفى طرف الحلة تصرخ فى الواقفين أن زحوا لى النملا وكانت تشرب أن وردت الماء صفوا ويشرب غيرها كدرا وطينا
ذات عصر وهى مضطجعة على عنقريبها فى حوشها وهى تراقب دجاجاتها مع صغارهنّ ، أذ فجأة ينفتح الباب وتندفع منه نعجة دون استئذان دائسة على ثلاثة من صغار الدجاج مخلفة اياهم جثث هامدة بهتت الحاجة سكينة من ذلك المنظر وهبت مزعورة ناحية النعجة وطرف ثوبها يتجرجر على الأرض ، امسكت النعجة من اذنيها وسحبتها خارج البيت وهى تزبد وتغلى ( دى نعجة منو دى؟ والله أن بقت نعجة اخوى الفى الترب إلا اكتله تانى دى نعجة منو؟ وكان صوتها كالرعد وهى تصرخ وتلوح بيدها – أخبرها احد الأطفال بانها نعجة ود الفكى – الليلة يا ود الفكى ما وقع راجل الليلة يومك ما تمّ وميراثك اتلمّ ابقى مارق لى لبرة والله نعجتك دى ما أديك ليها إلا تجينى بنفسك . وود الفكى كان فى البندر فى رحلة استشفاء مع أخيه المريض ، ارتعدت زوجة ود الفكىوأولادها واغلقوا بابهم خوفا من شرها وطبعا الخبر انتشر سريع جدا فى كل الحلة . وبعد صلاة المغرب أمر الإمام الجميع بعدم المغادرة واخبرهم بقصة نعجة ود الفكى مع سواسيو حاجة سكينة، ولان ود الفكى غايب فاولاده امانة فى رقبتنا احنا لازم نعمل حاجة نأمن شر الولية دى – المهم تشارك المصلون من جيوبهم مبلغ عشرة جنيهات ( رغم أن السوسيو الواحد ثمنه جنيه بس ) وحملوها لزوجة ود الفكى حتى تسكت بها حاجة سكينة إلا أنها رفضت وطلبت منهم أن يسلمها احدهم المبلغ ، تزاوغ الرجال من هذه المهمة الصعبة وكيف يا فاطمة يعنى بعدين انتن نسوان والامور دى بتحلنها مع بعضكن وفى النهاية الموضوع كله شغلانية نسوان ساى - حملت زوجة ود الفكى المبلغ على مضض وذهبت لسكينة التى ما أن رأتها حتى هبّت واقفة وهى تحتضن النعجة حتى لا يجرؤ احد على لمسها- هوووووووووووووي يا فاطنة أنا ما عندى معاك كلام نادى لى راجلك اتفاهم معاه أنا ما بتفاهم مع النسوان فاطمة قالت ليها الراجل مافى يا سكينة يا اختى لكن هاكى العشرة جنيه دى والله يعوضك وادينى النعجة – يعوضنى؟ أنا اقبل العوض؟ ليه قالوا ليك فقرانة ولا جعانة عدمانة ولا صرمانة محتاجة لقروشك أنا؟ ومش العشرة دى جيبيها اختطفت منها الورقة وقطعتها اربا اربا وقذفتها فى وجه فاطمة أمشى طيرى من قدامى تطيرى ما تركى قال عوض قال يعضيك دبيب
أها ناس الحلة عملوا لجنة لحل المشكلة دى واللجنة انبثقت عنها لجنة ولجنة تتحل ولجنة تتعقد وحاجة سكينة راسها والف سيف إلا يجيها ود الفكى . أخيرا قرروا يعملوا مؤتمر لحل المشكلة تحت شعار (نعجة تفوت ولا سوسيو يموت ) برعاية ناس الحلة كلهم . دقوا الصيوان وجابوا الساونات والبارد والحلاوة لانعقاد المؤتمر بس مع أول نفخة فى المايك ود الفكى جاء نعل مافى عوجة يا اخوانا الداير يعرس منو؟ عرس؟ انت ما جايب خبر ساى كدى اقعد واستهدى بالله وحكوا ليه الحكاية من قولة تيت للحظة انعقاد المؤتمر
ود الفكى هاج وزعل أفو تغلبكم مرة ما تخجلوا يا رجال عيب عليكم وكمان عاملين مؤتمر ومسخرة ؟ وشال سكينه وعلى بيت حاجة سكينة والحلة كلها بوراه دفر الباب بكراعه من غير اذن ولا دستور زى نعجته ما عملت وقف فى نص الحوش اها أنا جيت حتعملى شنو يعنى ولما لم يسمع اجابة عرف أنها ما موجودة وحمد الله فى سره ومسك نعجته لكن ناس الحلة برة فحب يستعرض وواصل فى الكواريك باعلى صوته انتى قايلانى هين ولا فرع بانة لين ؟ ما عندك والى يحكمك؟ الليلة بضبحك من الاضان للاضان والله سكينى دى تاباك . فى االحظة دى حاجة سكينة مدت راسها من حيطة الجيران وشايلة ليها سكين تضبح منو؟ يا ود الفكى؟ ود الفكى اسقط فى يده وألجمته المفاجأة قال ليها اضبح نعجتى الكتلت سواسيوك دى - وفعلا مسك النعجة وضبحها ويكورك ضبحتك ولا ما ضبحتك ، حاجة سكينة جات تنط الحيطة عشان تمنعه من النعجة، وهى ماسكة السكين وقعت فى الأرض وسكينها اتغرست فى رقبتها بالعرض (اتضبحت من الاضان للاضان) الناس لما سمعوا صرختها فتحوا الباب ولقوها مضبوحة وود الفكى شايل السكين ويقول ضبحتها والله ضبحتها
القرية هسه اسمها ود الفكى تكريما لاشجع رجل وأرجل راجل فى الحلة ونصبوا ليه تمثال وهو شايل سكين . المسكين اخد تأبيدة (عاد الحلة كلها شاهدة انه ضبح حاجة سكينة) لكن ما قادر يقول ضبحت النعجة ما حاجة سكينة وكل مرة يعض اصابعه وهو فى محبسه احيييييييييي أنا منك يا سكينة الله يضرك كان ضريتينى غير المشاكل ما عندك حاجة كان حية وكان ميتة يا الفقر

ابداع يا مبدعة حاجة سكينة اتلومت لكن الرجال ديل عايزين جنس حاجة سكينة دى

قصة جميلة والله يا ام اشرف. اها انتى زى حاجة سكينة دى؟
هووى يا ام روان الرجال مالهم؟ ما مساكييين ورايحين معاكم فى حق الله... انت ما سمعت بالمثل البقول الراجل بهذالجبال والمرة بتهذالرجال.

هووى با ناظم احنا المساكين وانتو موية من تحت تبن

حاجه سكينه صعبه, تسلمي ام اشرف

مشكورة ام اشرف احييك على هذه الاطلالة الابداعية وهذا على السرد الراقي للمواضيع رغم تسجيبك مؤخراً استطعتي ان تملكي كثير من قلوب اخووانك الاعضاء نتمنى المواصلة بنفس الهمة ولك تقديري.

منو القاليك كدة يا ام روان؟ والله نحن المساكين.

حاجة سكينة والله مبالغة بس ناقصة ليها رية عشان تتم الناقصة ..... قصة جميلة يا أم اشرف

والله يا ام اشرف الله يخلص لى الشغل عشان اجى جارى جرى للمنتدى وامتع نفسى بجمال روح كتابتك وحلاوتة. لكن قدر ما فتشت ما لقيت منك جديد. اها ياختى الله الله على الجد والجد مالو؟ الله الله عليهو...... نحنا ترانا اتعودنا عليك وعلى كلامك, وبقى لينا زى حبة الصداع او حبة منشطة وبكيفنا شديييد وبفرفشنا وبخلينا نضحك برانا ومن غير سبب.
اها دحين اختى ما تنقطعى. عارفين مشاغل الحياة لكن اضيفينا للمشاغل دى.
اها فتك بعافية.