اختباربجائزته

ضع من القائمة (أ) مع ما يناسبها من القائمة (ب)
االقائمة (أ)
1- وانت فى غربتك الموحشة وغرفتك الواحدة يجيك ضيف ثقيل ينتعل سفنجتك ويلبس جلابيتك ويتسوك بفرشتك ويتمطى فى سريرك وهو مكنكش على ريموت تلفزيونك بيد بينما اليد التانية ماسكة سماعة تلفونك - وبعد ما حضرة جنابه يقنع من التلفزيون ، ينهرك من تحت بطانيتك شنو ياخ الواحد اصله ما يعرف يرتاح معاكم؟ اطفى النور ده كرهتنا النوم زاته!!!!!

2- آخر الشهر، وانت داخل البيت - المرة سألتك ياراجل وينها اللحمة والخضار وبعدين السكر انتهى والبت طردوها من المدرسة عشان القسط التانى وهداك الولد محموم وما تنسى حاج الامين جاركم فى الحلة بكرة جاييك توديه الدكتورو الكهرباء فضل فيها فد كيلو و............. وطوالى انت دخلت اوضتك وطفيت النور وهاك يا شخير

3-ياسر السمين طلع يراجع السباليق ، عاين ناحية بيت حاج على - لقى بناته السمحات الاربعة قاعدات فى الحوش يتونسن وطبعا شافنه وهو معلق فى راس البيت - عايز يعمل فيها الولد حريف ورياضي ، وقف على حافة السقف وبقى ينط برجل واحدة (شدّت يعنى) النطة الاولى ، التانية ، التالتة رررب وقع على وشه فى الواطة وكسر رقبته ومات

4- فتحية البايرة أخيرا دخلت زمرة المتزوجين - راجل ماشاء الله رزين وعاقل وطبعا ده بفضل عامل السن (75سنة) ومريحها من شغلانية المطبخ المتعبة دى بس أكله زبادى وشرابه لبن (لانعدام السنون) - وكمان نضافة البيت دى مرة مرة بمزاجها وعلى كيفها ( عاد هو شايف كان البيت نضيف ولا وسخان؟)

5- راجل منال قبضوه فى شيكات ، النصيحة منال ماقصرت معاه وكلت اكبر محامية ضليعة فى القضايا دى وطلعته زى الشعرة من العجين وزولك من الحراسة وعلى شهر العسل طوالى مع العروس الجديدة (المحامية) - ما قلت ليكم ضليعة؟

6- يوم صرف الماهية المرة ضربت ليك فى المكتب تخبرك بان سيد الدكان وبتاع اللبن والجزار وناس دمغة الجريح وناس الموية وسيد البيت وناس النفايات كلهم منتظرنك فى خشم بابك - بماهيتك دى طوالى مشيت اجرت ليك بيت تانى وضربت للاولاد يحصلوك هناك بعفشهم

القائمة (ب)
1- ضل راجل ولا ضل حيطة 2- الرشاقة الكتلت اشراقة 3- الخواف ربى عياله 4- جدادة الخلا طردت جدادة البيت 5- ان كترت عليك الهموم اتدمدم ونوم 6- جابوه فزع بقى وجع

إجازي محنك يا أم أشرف بتجيبي الحاجات د من وين
عليك جنس خرمجات وهترشات وحاتك انتي حليتا كلها
بس أقيفي لي اشرب فنجان قهوتي دي واجيك راجعة
والجايزة دي أكان أديتيها لزول غيري من أسي المقاطعة

مبدعه يا ست البنات , واااااصلي عليك الله

غايتو يا أمجد يا ود أمي لقيتك شفقان شفقة
هي عدت قهوتي دي ساي ما أغسلا وانتظرا لحدي
ما تنشف عشان ادخلا الدولاب وضيوفي الجوني كابسين
علي فجاة ديل ما اقدمن لحدي بيوتن لكن وحاتو هو ألما بحلف
بي الكضب الجايزة حقتي وما بديك ليها أكان كسرت رقبتك

امجد يا مهيرة اختى ما بتلحق فى المسابقات المرة الجاية اسبقيهو سريع ويا ام اشرف الحلة
جايطة الليلة عندك فى الموضوع ده الحكاية شنو

مرينا وعجبنا سرد المسابقـة انا حليتها لكن بخلي الفرصة لي غيري وبرجع ليكم

أم اشرف شرحك ظريف جدا للأمثال .

الاولى جدادة الخلاء وخلو الباقي لغيري

انتى ياام شرف ما بتجى والا معاك ابداع وجنون؟
الجماعة حلو المسابقة قبيل لانو نحنا بنجى نص الليل بى توقيتنا.
سلامات يا ام الابداع.

انتو يا جماعة بتلومو فى امجد المسكين ده مالو هو لاشاف جائزة ولا حاجة والناس شافوه واقف من الصباح جنب بيت ام اشرف عشان تديهو الجائزة وعملتها ليو كلها اعذار يعنى يا مهيرة جهجهتى جبنتك ساى....

ام أشرف الحقيني ... ابوي ضرب لي قال لي : تعال سريع .... سيد الدكان وبتاع اللبن والجزار وناس دمغة الجريح وناس الموية وسيد البيت وناس النفايات كلهم منتظرينو جايا معانا هههههههههههههههههههههه

اها انا حليت الاختبار ( الخواف ربي عيالو )

النصيحة لالله الاختبار ساهل شديد وكلكم حليتوه لكن انا قلت ليكم شرط الاشتراك فى الاختبار ارسال 500 دولار فقط عشان تستلموا الجايزة وهى
الاولى - فيلا فاخرة وسط الخرطزم
التاتية - عربية موديل 2009
التالتة- عروس بشيلتها
الرابعة 5 مليون جنيه
اسرعوا يا اخوانا ولا تفوتكم الفرصة الفرص محدودة والجوايز قيمة انتوا بس اسرعوا بالدولارات الاجابات ما مشكلة المهم الدولارات

الدورار يا ام اشرف مش كدة؟