عايزين نتعرف على اعمامنا وخالاتنا

تذكير بمساهمة فاتح الموضوع :

عايزين نتعرف على اعمامنا و
خالاتنا
حافتح بوست عبارة عن لقاء كل مرة مع عضو او عضوة في المنتدى لكي نتعرف عليهم نحن الصغار ونتواصل معهم أول عضو اخترته عمو مصعب الشيخ استعد يا عمو مصعب للكرسي الساخن بتاع الأطفال اليك الأسئلة
الإسم؟؟
الهواية؟؟
أمنية لنفسك؟؟
أمنية للمنتدى؟؟
أمنية للدبيبة؟؟
أمنية للسودان؟؟
مكان الإقامة؟؟
متى آخر مرة زرت فيها السودان؟؟
لونك المفضل؟؟
أكلتك المفضلة؟؟
من هم أصدقائك المقربون إليك؟؟
حدثنا عن ذكريات في الدبيبة؟؟
ما أكثر لعبة تحبها عندما كنت صغير؟؟
عمو مصعب انت هلالابي وللا مريخابي؟؟
هل لعبت في فريق الدبيبة ؟؟
خلاص يا عمو مصعب كفاك وكلمة أخيرة لصغار المنتدى؟؟
(عمر)

لو عارفين عمر حيخليك تنزل صورتك كان من زمان عمل معاك اللقاء لانو مشوقين نشوفها ماشاء الله عليك ما نسحرك زدت وجاهة ووقار عينا باردة والشيب الزمن ده بقى عادى الرجال كلهم مشيبين والشيب وقار وبنشكرك على اللقاء الظريف ولو عايز تتعرف مع عمر على الاعضاء فى المنتدى ممكن تقرأ البوست من البداية وحتعرف الكثير من اعضاء المنتدى ولازم تجى مارى علينا فى الامارات لما تجى ماشى السودان وربنا يوفقك

الله عليك يا عمرو طلعت لينا المدفون وسرقت إنتباهنا وجذبتنا للقاءك الشيق والذي سيقتنا فيه على إجراء اللقاء مع اخونا الاكبر جلال وخففت عليه أسئلة الكرسي الساخن الذين من المفترض أن يجلس عليه .

لكن جلال ما قصر في لقاءك وعرفنا منه الكثير .... واقول للاخ جلال إنو بعد إنتهاء إتصالك مع الخال عبد الوهاب بشير تتذكر لمن اتصل علي الاخ نزار وأنت ... اصر خالي ان يقابلك وبعزييك لانه بعـزّك .. اها بعـد إنتهاء المكالمة قال لي بالمناسبة جلال ده مكسب للمنتـدى اقبضو فيه قوي زمان كان بعمل أشياء أكبر من سنـه ما شاء الله لدرجـة أنه عمل لينا ( طائرة ) وها انت قد ذكرتها بمحركاتها مما جعلني اتذكر كلام خالي عنك ..

ما شاء الله تعــدد الهوايات تدل على أفق واسع وعقل حاضر مميز يقبل التحديات ويكسر كل فضول بالمعرفة والتحقق من مكونات الاشياء حولنا ....

ربنا يحفظك ..... والصورة ما شاء الله آخر وجاهه ونضارة وزي ما قالوا الشيب وقار فزادك وقار إلى وقارك وحفظك وربنا يمدك كمان وكمان ويوفقك للذهاب إلى السودان لتقر عينك بأبناءك وبالاخص أشــواق ....

وإستمتعنا بي لقاءك يا عمروووووو

مشكووور وربنا يحفظك

متعه يا هندسه, ربنا يديك العافيه,

مشكور ابننا عمر على فكرتك الحلوة وربنا يحفظك يارب
الاخ جلال سعدنا جداً جداً بمعرفتك باشمهندس يا فنان يا مبدع

تسلم الاخ الاكبر قدرا ومقدارا جلال.
متعة المتعة دوما نحسها فى حروفك. دائما راقى وحنين ومثرى.
منتظرين مزيدك.

ام روان انا فعلا قاعد اقرا البوست بتاع عمر ومعجب بيهو جدا والحقيقة بالطريقة دي نحنا بنأهل ابناءنا وبناتنا وبنديهم ثقة في انفسهم ودا شئ رائع ولو نحنا لقينا الفرصة دي والفهم دا زمان كان بقينا حاجة ثانية يعني مثلا لو كان كبارنا في صغري لاحظو توجهاتي واحتوها كنت بقيت حاجة تانية لكن طبعا كان عندهم اهتمام او تشجيع وكان بيعتبرو الشغلانه لعب بنقور (اطفال) لذلك ان بشد علي يد كل اب واي ام واقوليهم ما تستهينوا بافكار اطفالكم حالوا شوفوا ميولهم وادوهم فرصة عشان يبدعوا .. وحاولوا تكتشفوا مواهبهم ثم شجعوهم عليها .. وبالمناسبة احكي ليك السبب في توقفي عن الرسم .. انا لقيت صورة لبنت جميلة جدا في مجلة وشلت الورقة وقلم الرصاص ورسمتها بطريقة مطابقة تماما وكانت معاي في شنطة المدرسة .. لسوء حظي بالصدفة طلعت كراساتي وكتبي والاستاذ الله يسامحو لمح الرسمة وبدل ما يقول دا شغل جميل وانت عندك موهبة جميلة ويشجعني قام وقع فيني خبت وقال لي شنو شغل الصعلكة والمراهقة دا قاعد ترسم لي في البنات ووو.. وفي النهاية قال لي تاني لوشفتك بترسم حا اجلدك وحا اوديك للناظر وخلا الحكاية وكانها جريمة كبري وهكذا كرهت الشغلانة وتوقفت عنها .. فارجو من كل الاباء والامهات ان ينتبهوا لهذا الامر وان لا يستهونوا اي شئ يفعله الصغار فكل فكرة مهما كانت صغيرة فهي مشروع لانسان او انسانه لهم شأن في المستقبل .. اما بخصوص المرور عليكم في الامارات فاتمني ان يحصل ذلك وإن شاء الله الفيها الخير ربنا يسويها

الاخ المدير اخيرا ظهرت وكنت فاقدك وكدت اكتب واسال عنك كنت مختفي الفترة الفاتت ونفتقدك في بوست طرائف الحميدية ولازم تشاركنا بي حاجتين ثلاثة لانو انا وعدت ابننا عمر الفاتح بتسخين البوست .. وتحياتي لعبدالوهاب الذي كان بالاضافة الي صلة الرحم من اعز اعز اصدقائي وكنت بفرح اشد الفرح لما يجي في الدبيبة وابطل كل مشاريعي واكون معاهو طول اليوم له التحية ولكل اخواني واخواتي اولاد وبنات عمي البشير وابناءهم وبناتهم واسال الله ان يجمعنا قريبا

ويا كربر انت كمان ربنا يديك الصحة والعافية وتحياتي لك وللاهل جميعا ولبيت طلبك كما تري

الاخت ام اشرف بت الدبيبة انا كمان سعدت والله بمعرفتك فالتحية لك ولزوجك ولاسرتك الكريمة وانا بدعوا ناس اراضي الدبيبة يدوك ارض في الدبيبة بس اعملي حسابك ما يجي يوسف عبدالفتاح يقلعا منك هههههههههههههههههههههه

ابو عدي تحياتي لك ولكن دايما اسئلتك صعبة وكبيرة لكن حا اجاوبك .. كما قلت انا كنت عضو في مركز شباب السجانة واخو زوجتي كان كذلك وتعارفنا انا واخوها واصبحنا اصدقاء وبدينا نزور بعض في البيوت وتطورت الزيارات بين الاسرتين وهكذا رايتها وكانت بنية صغيرة حليوة وحنكوشة وانيقة فلم اتردد وقلت لي اهلها يااخوانا انا داير البت بتدوني ليها وهم طبعا غير علاقتي بيهم كان عندهم تقدير خاص لي باعتبار اني من الدبيبة خصوصا انهم معجبين بي احمد المصطفي وسيد خليفة يعني دا اداني دفعة زيادة .. وبالمناسبة في مفاجاة حا اذكرها لاول مرة وهي كنت قاعد مع عمة زوجتي وكانت بتكلمني عن اصلهم وهم طبعا من شندي اصلا فقالت لي نحنا عندنا جدنا رجل صالح ومشهور ملقب بي ود التمر مدفون في الحلة الجنبكم الاسمها العسيلات وطبعا كانت مفاجاة كبيرة لي فقلت دا مش مدفون جنبنا وبس دا هو زاتو جدنا نحنا وهي كمان تفاجات وحكت لي العندها وحكيت ليها العندي وهكذا لقيت زوجتي من ارحامي سبحان الله يعني بعد دا الناس ما ينظروا لي زوجتي باعتبارها غريبة ولو انو دي ما مشكلة لكن كما تروا هي من لحمنا ودمنا

حبيبنا ونسيبنا واخي الصغير ناظم لك التقدير كله والاحترام واشكرك علي دعمك المتواصل واتمني ان احظي برؤيتك قريبا وياريت اكون من المحظوظين واكون في السودان ايام زواجك إن شاء الله

الاخ جلال شكرا ليك على التحية وتحاياك وصلت للاسرة
اها يا اهل الدبيبة سمعتوا اخونا جلال قال شنو قال ادونى ارض فى الدبيبة الحاضر يكلم الغايب ما تطنشوا الكلام ده

ههههههههههههههه جمال زي ده الله بيني وبينو ولا شنو؟! يعني لواتقدمت لي واحدة من بناتنا رايك بتقبل بي؟ اوعا المدام تسمعنا.. اشكرك يا ابا ذر علي مشاعرك الجميلة والمتوقدة دوما كلك ذوق بس الحاجات الكثيرة البتفرفر دي عملتها كيف؟! بعدين دي قعده ولا شنو؟!

هههههههههههههه ما تودينا في داهية يا اباذر

تسلم نسيبنا وربنا يدينا طولة العمر وكل الناس تحضر ان شاء الله.

يلا يا مولانا, في الانتظار

منتظرين سعادة المستشار.

يلا يا الصبي طلع المدفون زيتنا في بيتنا

يللا يا خالو عمورى مستنى وكلنا منتظرين

بسم الله اها جيتكم.

الاسم:- محمد الطاهر محمد دفع الله

العمر:- في داعي للاحراجات دي ياعمر 35 سنة

المهنة:- محامي ومستشار قانوني

الهواية:- الهوايات كتيرة جدا لكن نقول ليك منها القراءة والتعارف والتزود من كل ماهو مفيد

لو ما كنت محامي ومستشار قانوني تتمنى تكون شنو:-برضو محامي ومستشار قانوني لأني

بلقى نفسي في المهنة دي شديد وبحبها بجنون.

ذكريات الطفولة:- ذكريات الطفولة ياعموري جميلة جدا ولازلت بتذكر الحاجات الحلوة في

الدبيبة والالعاب الجميلة الكنا بنلعبها ونحن اطفال طبعا ياعموري الطفولة زمان في الدبيبة

كانت حاجة جميلة جدا وكنا في ايام الاجازات بنلعب اليوم كلو من الصباح كورة وبعد الفطور

بنطلع نقعد في دكان احمد عبدالله مع غازي او دكان السارة مع حديد وبعد داك بنصلي الضهر

في الجامع ونقعد في الشجرة ام عكن ننتظر بص عباس لحدي مايجي ونمشي نوصل الناس

الكبار البكونو شايلين حاجات لانو نحن من زمان علمونا نساعد الناس ونسمع كلام الناس

الكبار عشان كدة كنا لمن نساعد الناس الكبار بنكون مبسوطين وهم كمان بكونو مبسوطين

مننا وبكافئونا.

المهم بعد داك بنمشي البيت نتغدى والعصر بنطلع نلعب كورة والميدان كان ورا بيتنا وجمب

بيت ناس عمو ناظم ده لمن كنا صغار.

بعدين بنرجع البيت المغرب ناخد راحة شوية ونطلع تاني نلعب العاب كتيرة زي الرمة

وحراسها وشليل وينو ولية وبمبة ونرجع البيت نتعشى وننوم.

طبعا ياعموري الكلام ده لمن نكون في الاجازة لانو ايام المدرسة مافي لعب كتير كدة.

وعندنا ذكريات كتيرة وجميلة عن الطفولة لكن ماداير اطول على الناس.

المهم انها كانت ذكريات جميلة جدا وفيها اتعلمنا احترام الكبير ومساعدة الناس وحاجات كتير

جميلة.

لونك المفضل:- الازرق مع اني مريخابي لكن في اللبس جميل

اكلتك المفضلة:- اي اكل بتعملو امي مفضل عندي لأنو اكل امي جميل جدا.

سيارتك المفضلة:- لاندكروزر


بلد تتمنى زيارتها:- السعودية للحج واسبانيا

انت مريخابي ولا هلالابي:-انا مريخابي على السكين

ماذا تعني لك الدبيبة:- الدبيبة تعني لي كل شيئ فيني وفي كل يوم احمد الله انني من الدبيبة

فهي حبي وعشقي واحترامي ونشأتي ونضوجي وشخصيتي وهي الام التي اعطتنا ولازالت

تعطينا ولم نوفيها حقها. فنحن منها ولها وبها ويكفينا ذلك فخرا.

ماذا يعني لك السودان:- عشق الانتماء وجمال الوطن الذي اكتسبنا منه اجمل الصفات والتي

هي حديث الجنسيات الاخرى.

ماذا تعني لك الأم :- الللللللله ياعمر هي حياتي وحبي وعشقي هي من وهبني عمره لأحيا

ومن شقي لأسعد ومن سهر لارتاح ومن اوقد نفسه شمعة لينير لي طريقي.

انها حبيبتي التي لم ولن يستطيع احد ان يأخذ مكانها في قلبي.

انها عظيمة وغالية وعزيزة.انها نعمة من المولى عز وجل ويالها من نعمة.

انها فرحي وسعادتي وسروري وكل شيئ جميل في حياتي.

كل شيئ جميل عندي فهو منها ، وكل نجاح حققته فهي خلفه ، وكل خصال سمحة فيني فهي

غرستها، وكل محمد الطاهر فهو امه .

تحت اقدامها الجنة وفي رضاها الجنة وهي تدخلك الجنة ، فهل نستطيع ان نوفيها حقها؟

ليتني اكون سعيدا واقضي باقي عمري بجوارها فهي الحياة لمن اراد حياة وهي النعيم لمن اراد

نعيما.


ماذا تعني لك الغربة:- ابغضها ولكني مجبر عليها .

رأيك في المنتدى:- اجمل حاجة في الغربة جمعتنا مع اهلنا البعاد وخلتنا نتواصل معاهم عشان كدة ياعموري خليك متواصل مع

اهلك عبر المنتدى باستمرار عشان تتعرف عليهم

يعني المنتدى بقى اهم حاجة في غربتنا دي.

احكي لنا حكاية تسميتك بالصبي:- طبعا السماني الصبي اخونا هيثم علي مضوي ومعاهو

الثعلب كنا زمان بنتعشى مع بعض بالبوش ( فتة فول ) وانا كنت اكال اكل شديد سفساف يعني

وكنت باكل كتير فكان هيثم كل مايشوفني باكل كدة بقول لي (صبي والله) يعني ولد نجيض.

ومن اليوم داك بقو يقولو لي الصبي. لكن اسي خليت الاكل بقيت ماباكل كتير.

لو وجدت وردة جميلة لمن تهديها:- اهديها لأجمل شيئ في حياتي وسببها ابي وامي

سؤال تتوقعني اسألك عنو وما سألتك:- المراحل الدراسية وهي الدبية الابتدائية والعمارات

المتوسطة والكلية القبطية ثم جامعة النيلين كلية القانون خريج سنة 1996

سمعت انك كنت مشجع قوي لفريق الدبيبة احكي لنا عن قصص التشجيع وهل لعبت في احدى فرق الدبيبة:- بالنسبة للتشجيع طبعا

انا كنت مشاغب جدا وكنت بألف اغاني التشجيع للفريق

وبكون حماسي جدا لانو نحن كلنا كنا بنحب الدبيبة بجنون لدرجة انو مرة في الاستاد الضابط

بتاع الشرطة قبضني وختاني في الحراسة اربعة ساعات.وقال لي انت عامل شغب في الاستاد

والقصص كتيرة جدا مادايرين نطول على الناس لكن اذكر واحدة منها : انا طبعا كنت بشاغل

لعيبة الفريق الخصم وفي يوم كنت قاعد في الجامعة مع اصحابي جاء سلم علي واحد مابعرفو

قال لي ازيك ياود الدبيبة قلت ليهو اهلا قال لي ماعرفتني قلت ليهو لا والله قال ياخي انت

معذبني عذاب في العيلفون انا كل ماتكون عندنا كورة معاكم بكون شايل همك انت اكتر من

فريقكم لانك بتقابلني انا بس وتنبذني واتضح انو هو من الخرطوم ومسجل في هلال العيلفون وانا

اتذكرتو طوالي وكان مهاجم خطير جدا.

انا لعبت اول شيئ في فريق بنجننا طبعا كان فريق مشهور جدا ومعظمو من المشاغبين عشان كدة سموهو بنجننا نسبة للجن لانهم

كانو بجننو اي حاجة. وبعد داك انتقلت للعب في الميدان الكبير مع فريق الدبيبة .

كلمة اخيرة:- اشكرك ياعموري على اللقاء الجميل ده وعلى حرصك على معرفة اهلك

واصل ونحن من خلفك.

وبحب اشكر اهلي واحبابي ناس المنتدى الاتحملو كلامي الكتير ده ومازهجو مني

وبشكر الاخ زاهر وكل من شارك معه ليرى هذا المنتدى النور والذي اصبح جامعا لنا.



مااكون زهجتكم؟؟؟؟؟؟؟

لقاء جميل يااستاذ وتسلم ولدنا عمر واحييك على نشاطك ومتابعتك للمنتدى.

والله ما زهجتنا طبعا انا اول مره اعرف سموك الصبي ليه لكن اسي خلاص كبرت وموضوعك جميل تسلم يا عموري

تسلم ياحبيبنا عبدالناصر يعني الحمد لله مازهجناكم.

والله ياودالباشا بالغت زمنك ده كلو ماعارف وماسألتني ؟؟؟؟؟

والله طلعت مابتاع شمار!!!!!!

مشكور على الاطراء الجميل.

يا سلام يا سلام عليك يا من علمتنا حب الام وحب البلد يا سلام عليك يا من نتعلم منك دوما الجميل والمفيد كلماتك جاءت صادقة ومعبرة وقوية كقوة شخصيتك نزلت علينا خفيفة كخفة دمك وشفافية روحك لقاءك قمة فى الروعة اعطيتنا دروسا قيمة ومنك دائما نتعلم الله احفظك لينا يا اخى وتسلم

تسلمي ياام روان والله يخليك لينا ويديك العافية.