عايزين نتعرف على اعمامنا وخالاتنا

تذكير بمساهمة فاتح الموضوع :

عايزين نتعرف على اعمامنا و
خالاتنا
حافتح بوست عبارة عن لقاء كل مرة مع عضو او عضوة في المنتدى لكي نتعرف عليهم نحن الصغار ونتواصل معهم أول عضو اخترته عمو مصعب الشيخ استعد يا عمو مصعب للكرسي الساخن بتاع الأطفال اليك الأسئلة
الإسم؟؟
الهواية؟؟
أمنية لنفسك؟؟
أمنية للمنتدى؟؟
أمنية للدبيبة؟؟
أمنية للسودان؟؟
مكان الإقامة؟؟
متى آخر مرة زرت فيها السودان؟؟
لونك المفضل؟؟
أكلتك المفضلة؟؟
من هم أصدقائك المقربون إليك؟؟
حدثنا عن ذكريات في الدبيبة؟؟
ما أكثر لعبة تحبها عندما كنت صغير؟؟
عمو مصعب انت هلالابي وللا مريخابي؟؟
هل لعبت في فريق الدبيبة ؟؟
خلاص يا عمو مصعب كفاك وكلمة أخيرة لصغار المنتدى؟؟
(عمر)

كربر عارفاك داخل مختفى احنا منتظرنك اظهر وما حنفكك رد على الاسئلة يللا سريع

الاسم?
عبدالمحمود احمد عبدالله الامين
العمر?
الاعمار بيد الله يا عمور

الهوايه?
كره القدم والاستماع
مكان الاقامه?
دوله الدنمارك مدينه SKIVE
امنيه لنفسك?
الاماني كثيره يا عمير ياعسل ربنا يحققها بس منها زياره قبر الرسول الكريم
امنيه لوالديك?
ربنا يديم عليهم نعمه الصحه ويعطيهم طول العمر قولوا امين
اشجع سيد البلد الهلال هلال الملاييين
اكتر لعبه كنت احبها كره القدم , الكوشتينه
الاكله المفضله?
الفلافل, والحلويات
اخر مره مشيت فيها السودان متين?
2002 ربنا يرجعنا سالمين غانمين
كلمه اخيره?
ربنا يخليك ياعمور ويحفظك, وكل عام وجميع الاعضاء بالف خير بمناسبه شهر رمضان المعظم, اسئلتك حلوه يا ابو عمير تحياتي للاسره

وردك اجمل واظرف ورمضان كريم واستعدوا يا باقى الاعضاء الدور جايكم عمير حالف ما يخليكم

تسلم ياعمر ونحن المرة الجاية عايزنو مع ام اشرف لاننا متشوقين ان نتعرف عليها من قرب وربنا يحفظك وماتطول الغيبة

سبحان الله عمير اليوم اتفق مع ام اشرف انو المرة القادمة اللقاء معها وده توارد خواطر وانتى من ضمن القائمة استعدى

شكرا عمو كربر على الأجوبة الحلوة واشكر خالتو ام اشرف واشكر خالتو بت الدليجة على المرور ورمضان كريم وماما شرفتيني بمرورك

اولا الشكر لعمير وروان ومن خلفهم الام العظيمة والوالد العزيز وشكرا لك ام اشرف وتسلمى وفكرتك حلوة يا بنت الدليجة, وبعد ام اشرف جهزى روحك.
كربر كالعادة خفيف الظل.
تسلموا ورمضان كريم.

السلام عليكم اولا اشكر عمو ناظم على الكلام الراقي
والليلة حيكون اللقاء مع خالتو ام اشرف استعدي للأسئلة
الهواية؟؟
المراحل التعليمية؟؟
مكان الأقامة؟؟
الأكلة المفضلة؟؟
لونك المفضل؟؟
امنية تجول بخاطرك؟؟
من خلال تجوالك في المنتديات الأخرى ما هو تقييمك لمنتدى الدبيبة اون لاين؟؟
ذكريات الطفولة إحكي لنا عنها؟؟
فنانك المفضل ومادحك المفضل؟؟
اجمل منطقة زرتيها في السودان واعجبتك؟؟
سؤال كنت تتوقعي ان اسألك عنه ولم أسالك؟؟
رياضتك المفضلة؟؟
الفريق الذي تشجعينه؟؟
كلمة اخيرة؟؟
إنتهت الأسئلة وإنشأ الله تكون ساهلة

اولا يا عمر مشكور على اللقاء وان شاء الله يا رب اكون ضيفة خفيفة عليكم
يلا بسم الله نبدأ

الهواية؟
القراء ة والاطلاع والسياحة
المراحل التعليمية؟؟
الابتدائية ما بين هيروشيما باليابان والقاهرة بمصروالمدرسة العالمية بالخرطوم – المتوسطة بمدرسة النيل الابيض بالخرطوم غرب- ثم مدرسة الخرطوم الجديدة الثانوية – واخيراً جامعة النيلين كلية التجارة قسم المحاسبة
مكان الأقامة؟؟
حالياً الخرطوم – منطقة الكلاكلة
الأكلة المفضلة؟؟
العصيدة بملاح النعيمية
لونك المفضل؟؟
الازرق
امنية تجول بخاطرك؟؟
اشوف اولادى كبار واحضر جديدهم
من خلال تجوالك في المنتديات الأخرى ما هو تقييمك لمنتدى الدبيبة اون لاين؟؟ منتدى اكتر ما يميزه ترابط وصداقة الأعضاء مع بعضهم ،كما اعجبنى طرح المواضيع بصورة مرحة وبسيطة تجزب كل الأعضاء وتجبرهم للمشاركة - الترحيب بالضيوف والتشجيع هو السمة والميزة التي اختص بها دوناً عن غيره من المنتديات ما جعلنى احس وكأننى ببيتى ووسط اهلى
ذكريات الطفولة إحكي لنا عنها؟؟
ههههههههههه زكريات كلها شقاوة ومرح برئ ولعب ونطيط واللعب ببنات أم لعاب وتفصيل الفساتين لهن مع جرجرتى لطرحة حبوبة ولا توب امى - زكريات حلوة لا تنسى يا ريتها تعود
فنانك المفضل ومادحك المفضل؟؟
فنانى المفضل هو عبد الكريم الكابلى اعشق غناه حتى الثمالة ، تعجبنى ثقافته ، اهتمامه بالتراث هدوءه في الكلام وارتياحه في الغناء والمادح شيخنا البرعى تعجبني قصائده وبلاغتها اللغوية صحيح هو لم يقم لادائها الا انه تعجبنى كلماته في مدحه صلي الله عليه وسلم
اجمل منطقة زرتيها في السودان واعجبتك؟؟
منطقة كنانة بالنيل الابيض دون شك ففيها عملت كمحاسب لمدة سنتين منطقة غاية في الجمال والتخطيط مع مناخ ربيعى دائم طول السنة فهى منطقة سياحية تستحق الزيارة ودى دعوة لكل الأعضاء لزيارة كنانة والتمتع بطبيعتها الخلابة (شرق مدينة ربك وتبعد عنها 26 كيلو وتبعد عن كوستى 34كيلومتر)
سؤال كنت تتوقعي ان اسألك عنه ولم أسالك؟؟
كنت متوقعة تسألنى عن إسمى بالكامل وحارد ليك رغم انك ما سألتنى : رانيا سيد عثمان
رياضتك المفضلة؟؟
ما بحب الرياضة وان كنت في الثانوية في فريق كرة السلة
الفريق الذي تشجعينه؟؟
والله الكورة دى ما بفهم فيها ولا شى
كلمة اخيرة؟؟
لك الشكر اجزله ابنى عمر وربنا يوفقك ويسدد خطاك يا رب

ردودك اكثر من رائعة وعرفنا حاجات كنا عايزين نعرفها وتسلمى

تسلمى يا ام اشرف وسعدنا بمعرفتك اكثر.

ام روان كيفك و اسئلة ابننا عمر هى الرائعة - وفعلا هذا الشبل من ذاك الاسد تحياتى لك والاخ نصر الدين وتسلموا
الاخ ناظم لك التحية وسعدت انا بمعرفتك وربنا يدوم الالفة والمودة
وسعادتى اكتر بتعرفى على اعضاء المنتدى - رغم اشتراكى الذى لا يتعدى الشهرين الا انه وبفضل الله وحمده تعرفت على اغلب الاعضاء واكثر من ثلاث ارباع المنتدى اصبحوا من صفوة صديقاتى واصدقائى ومعرفة الرجال كنز ومعرفة النساء مكسب ما بعده مكسب
ومشكور ابو عمير

في المقام الاول اشكر عمير وروان علي هذا البوست ....ومن خلفهم عمتو ام روان والاخ نصر الدين هههههه ...
حبيبنا كربر شابكني دفعة انا قدرك ؟ طيب ابيت تقول عمرك ليه
تشرفنا بمعرفتك الاخت ام اشرف وفعلا انت ببيتك ووسط اهلك ولك منا كل تقدير واحترام .... وادام الله صداقتك مع اهلك واخواتك واخوانك بالمنتدي ........

نايس بيبي يكفينى فخرا وجودى بينكم
تسلم

كربر يا عجوز - بالله انت دفعة نايس بيبي؟
سعدت بمعرفتك

يانايس يا قلب, وينك انت يادفعه تاني, ايه رايك? ايوه يا ام اشرف انا دفعه نايس شنو ليك ما عجوز

ابا زر لك التحية ومشكور على الدعوة - وكنانة اجمل من ام روابة كتير - تحياتى
عمو كربر ما عجوز لكن كبير- تسلم

kay مدام , ممكن اسالك سؤال يا ام اشرف, عاوزين نتعرف,

اشرف عمره كم سنه

اشرف عمره خمسة شهور هو وتومه احمد

عسل والله, ربنا يخليهم, تشرفنا يا ام اشرف,

الله يخليك يا كربر

لك التحية امجد ومشكور على الاطراء ، وربنا يقدرنى على التواصل كمان وكمان - تسلم يا راقى