خطيبتك ما تفسحها فى الكورنيش وجزمتك ما تعودها على الورنيش

قولوا لى ليه؟ لأنه الدنيا ما معروفة والظروف مع الناس - يعنى كان عندك قريشات زايدة ما تقوم تبعزقها فى الفارغة والمقدودة . لو فرضنا إنك أيام الخطوبة بتعزم خطيبتك طوالى على كافتريات ومطاعم سياحية ، فخمة وراقية ، أها بعد عرست وكملت القدامك والوراك فى الشيلة والمهر والشبكة والحفلة والكوافير والسيرة وما باقى ليك غير حق شهر العسل (وأريته كان يقضيك نص شهر)، تلاتة يوم وتكون بقيت على الحديدة . أها عاد العروس بترضى ليك بحشوة الطعمية ووجبة الفول ابو خمسمية؟ أكيد لا وحتقول ليك يا كضاب يا غشاش عامل لى فيها مروق ومرتاح وأتاريك أقرع ونزهى ؟ اها شفت جبت لنفسك الكلام والاهانة ساي كيف؟ يعنى فى داعى هسه للاحراج وتدخل نفسك فى اضافرينك كده ؟ لو كنت من الاول بتعزمها على كباية عصير وصندوق لبان ، هسه كان فاجأتها فى شهر العسل بساندوتش بيرق وقزازة بارد ! عاد كان تشوفك عزيتها عزة ما بعدها عزة تب
ا طيب كان اشتريت ليك جزمة وفى جدتها دى واول مشوار ليها تمسحها بدلقان وتقشقشها من الغبار وانتهى الامر تبقى نضيفة وظريفة واتعودت على كده . لكن يومك التمسحها بورنيش تانى تتدلع فيك وتحلف كان تلمع ولا ترارى ، كيتا عليك هى قالت ليك ورنشنى ما شلاقتك .

لو ولدك دخلته مدرسة خاصة , ترحيل مكندش ومن الباب للباب ، لغات أجنبية ، وتور برة السودان ، وحركات. بس فجأة الدنيا قلبت عليك و ورتك وشها التانى ، وقلت للولد خلاص نحولك مدرسة الحكومة ويا دى فى خشم الباب ، أمك تناولك الفطور بالحيطة . الولد حيصرخ في وشك ويقول ليك : يا أبوي كان ما قادر على عيشتنا طلعنى من المدرسة كله كله وخلينى ادوح لى بمناديل وكشاكيش أساعدك بيهن فى المصاريف . عاد فى احراج اكتر من كلام الشافع ده ما بقاك قدر السمسمة
أنا ما بقول ليكم ما تصرفوا (أما بنعمة ربك فحدت ) ولا بقول ليكم اسرفوا لكن اعتدلوا فى الصرف ربنا سبحانه وتعالى قال (ولا تجعل يدك مغلولة إلى عنقك ولا تبسطها كل البسط فتقعد ملوما محسورا) صدق الله العظيم ولا رايكم شنو يا شباب أنا غلطانة؟

والله ابدا ماغلطانه .وزي ما بقولو القرش الابيض لليوم الاسود.مشكوره كتير ام اشرف مواضعيك مفيده جدا.

لالالا مافي غلط, التوفير مهم مافي داعي للفسحه بلاش منها, الله يديك العافيه ام اشرف

احمد حسن - كربار والسكرتيرة مشكورين على المرور ويديكم العافية ويا سكرتيرة ما ترهقى الراجل بالعزومات خليه القريشات العنده دى يلمهن ليك بعدين ينفعنك وينفعن اولادك

يعني بالواضح كدي مانخرب طبعهم وكلامك صاح ميه الميه



تحياتي

محمد ود فع الله ما قلنا ليك ما تخربوا طبعهم لكن ما تسرفوا معاهن
فواز ده شنو الجن البتسوى فيه ده انت ما طوفشت عديـــــــــــــــل والبنات ديل سون ليك ساحوتة فى راسك ، الله يشفيك يا جنة

وصيتك مية مية يا ام اشرف.

يعنى يام اشرف اوديها حدائق حبيبى مفلس ولا كيف نعم اخشوشنو فأن النعمه لاتدوم لكن انا بقول اتنعمو لانو الخشونه جاية جاية ودوام الحال من المحال وخلونا نعيش اللحظه اها رايك شنو كيدا عليك انا حا امشى اعزمها فى برج الفاتح ورينا انتى اخر مرة ابو اشرف عزمك وين بصراحة كدا وتسلمى اختى

مشكورين على المرور احبتى ويا ود عدلان ايام الخطوبة ما زى بعد العرس زمان ابو اشرف طوااااالى بيعزمنى ما بتغير محلنا اصله كنا بنمشى مطعم فندق قصر الرشيد - هسه بعد ما قبض قبيضه و حمد سيده يعزمنى كل شهرين مرة يا حليل زمان

ام اشرف اشكرك علي المواضيع الهادفة ببساطة اهلنا الطيبين.....
كلامك عين العقل والبنات صعبااااااااااااااااااااات، (والله دا حار ودا ما بنكوي بيه ، وان فعلت ووووب وان خليتن وووووووب ) ووصيتك دي فوق راسنا .... بس الله يبقيهن هدياااااااات ورضيااااااااااات.... . وياشباب اسمعوا كلام ام اشرف ..

تخريمة بتعليق:
انني من المعجب جدا بكتابات الاخت ام اشرف ، وانني اسعد واقول لها انك اضافة حقيقية لهذا المنتدي ، بكلماتك البسيطة ومعانيها السامية ، مرحبا بك ( متاخرا ) وارجو ان لا تنقطع كتاباتك حتي تعم الفائدة ، ولا تبخلي بما لديك من مخزون تراكمي للمعلومات ، واشعر بان لديك خبراااااات بالمنتديات ، حفظك الله ولك تقديري واحترامي

ام أشرف دي إنتي الكاتبة الموضوع دا بتمني من فواز وموني العدل عن قرارهم تجاه ام اشرف واقول ليك أبو أشرف ما هرشتي كويس لانو خلا عزوماتو ليك لقيتك طيبة والجدادة تاكل عشاك
موضوعك جميل وانا ما حا اخطب حا اعقد طواااااااااالي

موضوعك جميل لكن من اولها ادعي الفقر دي مشكلة لكن بعد تفبض قبضيك وتحمد سيدك ممكن تعمل فيها مجنون ومفلس لكن في الخطوبة ممكن البنت تذوق منك.
تخريمة: ياام اشرف فتحتي نار على نفسك واديتي فواز وموني واشرف فرصة الله يكون في عونك.

بالجد اخجلتم تواضعى بمروركم الكريم ، ووصيتى دى لاخوانا الصغارالماشين فى الدرب ما بقول ليكم ادعوا الفقر لكن وريها وضعك من البداية عشان بعدين ما تتصدم بالواقع دى الرسالة العايزة اوصلها وصراحة بيهمنى امر الشباب الفى الطريق وناويين يكونوا اسر ربنا يوفقهم جميعا واكرر تزكروا قوله تعالى ( ولا تجعل يدك مغلولة الى عنقك ولا تبسطها كل البسط فتقعد ملوما محسورا) صدق الله العظيم