قصة ابو الدرداق

يا اخوانا عايزة اصحح ليكم معلومة التصقت إفكآ وبهتانآ باخينا أبو الدرداق ، حيث سرت اشاعة مغرضة من بعض الحاقدين والحاسدين بأنه مجكس القمرة وما اجتهاده ونضافته للواطة دى إلا نزولآ عن رغبة ست الحسن والجمال حتى تتكرم وتهبط للارض ومن ثم يتم زفافهما . لكن كضب والله هو فاضى للقمرة ؟ ولا هي من اصلا بتعاين ليه ولا شغالة بيه
الحكاية وما فيها انه وزارة البيئة طرحت عطاء لتقديم مشاريع لإصحاح البيئة مع مفاجأة كبرى لمن يرسو عليه العطاء . تقدم الآلاف حاملين مشاريعهم . استقر رأى اللجنة بعد فرز العطاءات المغلفة بالشمع الاحمر على ثلاثة مشاريع هى صاحبة اقل تكلفة ،تقدم بها كل من : الغنماية – البومة – وابو الدرداق . وللعدالة قررت اللجنة الاجتماع بثلاثتهم موضحة لهم بأن يكون البيان بالعمل بان تعطى كل متقدم فرصة لتطبيق مشروعه عملى مع مهلة ثلاثة أيام وانجحهم سيرسو عليه العطاء. حيث كانت مشاريعهم كالآتى:
- الغنماية : قالت أنا بعدم ليكم الواطة دى اسم الكيس وبعشرة جنيه بس.
- اقترحت البومة التخلص من الفئران ومن غيرقروش
- أبو الدرداق جاء عنوان مشروعه : أرض نضيفة وبيئة لطيفة وبالمجااااااااان
خرج الثلاثة من الوزارة وكل يحمل امال واحلام عريضة بالفوز . اها الغنماية نزلت اكل في الاكياس دى ما خلت كيس طاير المغرب بطنها اتنفخت رقدوها فى المستشفى البيطرى وجاراتها ما قصرن عواميد البرسيم والردة دى تتطاقش وحالتها ماشة متأخرة تانى يوم الصباح ماتت
البومة مشت على المزارع ولقطت الفيران دى فار فار تقزقز فيهن زى التسالي اها وهى ماشة على الحلة لاقاها فار دايخ ومريضان طوالى لهطته واريتها كان ما بلعته . اتاريه كان شارب ليه صبغة شعر بعد ما خطيبته جدعت ليه الدبله في وشه . ياحليلها البومة بيتها ما وصلته سلمت الروح.
أبو الدرداق بدا يشتغل نضافة جد يدردق ويدردق أصله لا كلّ لا ملّ لا فتر لامن نسي روحه والوزارة نسته واهله نسوه وأصحابه نسوه بس شغال نضافة مواصل الليل بالنهار . وبعد شهر انتبه لنفسه مشى الوزارة . لقى الحكومة اتقلبت والوزير غيروه ومشروعه شرّطوه . أها صاحبكم جن بوشه لكن النضافة بقت ليه عادة ولا زال يعمل بالنضافة. لذا قررت المحلية منحه وسام النضافة من الدرجة الأولى
بس دى كل الحكاية وهووووى يا ناس خلوا الخلق للخالقها وما تفتروا على البعض زورا

ما قصرتى مع ابو الدرداق يا ام اشرف دافعتى عنو لكن امانة فى زمتك ما لقوا غير ديل انضفوا البلد اكون دى القمرة طلبت الطلب ده وعملتها فيو وخلتوا انعرك واتفرك ويا حليل زمن الغنم والاكياس اسى الدنيا ما مسخت مما راحن وما تطولى الغيبة ما بنقدر على فراقك

مشكورين ودبركات وابوعدى على المرور وما تغالطنى يا ابو عدى ياها القصة كده انا ماخداها من ارشيف وزارة البيئة ولو مكضبنى بس راح اوريك ليها - عاد يا ام روان ما لازم ادافع عنه العالم كله اكل لحمه شابكنه عريس القمرة عريس القمرة وانا لما سالته قال لى قمرة شنوياخ ، دى مرة حايمة الليل كله والنهار فى بطن بيتها ما بتنفع معاى الدايحة دى