فوبيا الكلاب

الأيام دى يا اخوانى ما عندى زمن عشان اكتب في مواضيع فما لقيت غير روحى دى اكتب عنها
بعد النسيان عايزة احكى ليكم عن مشكلة تانية برضه عاملة لى عقدة وقلق وهى الخوف من الكلاب ، فمن صغرى وانا بكرهها وبخاف منها موت – وكان شفت لى كلب في راس الشارع بخلى ليه الشارع كله كله ولو مافى طريقة اغير الشارع بلغى مشوارى طوالى . عقدتى من الكلاب خلتنى اكره لعبة الليدو عشان زرايرها اسمهم الكلاب ، والعجب النملة السوداء السريعة دى الاسمها كلب الحر مكجناها ، كما اننى من مقاطعى اغانى الفيديو كليب لما في كلمة الكليب من احرف قد تشكل كلمة كلب . واستغرب شديد لما يعلقوا في النادى لافتة كلوب
مرة طلعنا مشوار ، وطلبت من أبو اشرف يشترى بعض الكتب والمجلات – أها دخل المكتبة وانا منتظرة برة . بس فجأة اشوف ليك كلب ابيض كبير ومكشر سنونه جارى على العربية ، وقولة هو فتحت باب العربية وجدعت شبشبى وقلت يا فكيك ، الكلب جارى وانا قدامه بس تقول فاكنّى بنبلة ، جريت جرى عمر الخليفة ما يحصلنى – لما فترت وقفت واتلفت وراي ، لا في كلب ولا حتى ضله – صلحت توبى ورجعت العربية ، وحمدت الله على وصولى بالسلامة – الراجل لما جاء قال لى مالك منططة عيونك وشكلك مخلوعة كده؟ قلت ليه الكلب سكانى . عاين لى باستغراب وقعد يتمتم بسم الله الرحمن الرحيم . لما وصلنا طبعآ نزلت حفيانة ، سألنى وينه شبشبك يا مرة؟ قلت ليه هي ما جدعته ساعة سكانى الكلب . ولا زال يتبسمل ويتحوقل وهو واثق مية المية من اختلال عقلى ، وكل مرة يسألنى انتى متأكدة سكاك كلب ؟ وعليك الله شبشبك وديتيه وين ؟ همه في الشبشب لأن صاحبة الشبشب الله يرد ليها عقلها ويشفيها
عارفاك يا أبو اشرف حتقرا الموضوع ده أها دى حكاية الكلب . الما مصدقنى فيها عشان ما تتهمنى بالجنون ساي

ههههههههه طلعتي خوافة كنتي واهمان بقلبك الكبير ولسانك ال....يل اخيرا جاء الكلب ورانا حاجة .
فعلا هناك اناس يخافون الكلاب لدرجة الموت لو شافوا كلب ساي جسمهم يقشعر ويعدو يحسبو في خطواتهم لو كان الكلب نائم يا بختهم ولو كان صاحي تلقي دقات قلبهم مثل دقات مولد الكهرباء في سرعة فائقة ..

أحكي قصة حصلت لي واحد كان مار في الظلام وشايل بطاريتو وفجاءة وهو يحمل البطارية ولع البطارية في وجه ثلاثة كلاب فانهجم من المفاجاءة وفي هذه اللحظة قرر ماذا سيفعل لو جري الكلاب صوف وراو ولو وقف الله قال بقولوا ....وفي هذه اللحظة قرر الهرب باقصي ما يمكن وكان هناك كمية عميقة من المياه وهناك في الشارع مجموعة من النسوة فقرر يا يمر بالنساء يا ان يقطع المياه لانو النسوان حا يكشفوا حالوا .... وقرر الهرب عبر المياه وبالفعل جري بكل ما يملك من قوة عبر المياه والكلب بي وراه ودخل المياه وهو يرتدي سفنجة والكلب وقف عند حافة المياه ينظر اليه وهو يضحك وعمك بي سفنجتو واليماه ما وقف الا في بيتهم وطبعا السفنجة لم تصمد في المياه انملصت منه في المياه وبعد ساعة تقريبا رجع صاحبنا لمكان الحادث ليأخذ سفنجته العالقة من المياه وهو يقول في نفسه هرب بالمياه ولا كشفت حال لو مر بالنسوان وفعلا كان موقف جد مضحك

هههههههههههههههه يعنى البيهجمه كلب لازم يا يروح شبشبه ولا سفنجته الكلاب دى شكيتها على الله

حاشاك من الجنون يا ست العاقلين لكن انا بخاف من الكلاب لدرجة الجنون ونصرالدين داك مشهور شهرة كبيرة بخوفوا من الكلاب ولا بجامل ومعلنها والبيت الفيهو كلب ما بدخلوايعنى كان سكانا كلب الله يكون فى عونا

ههههههههههههه والله كان سكاكم كلب بس البسي شبشبك فى يدينك و اجرى ولا تقولى روان وينا ولا عمربيعضيه الكلب بس قولى يا رقبتى واجرى

ام اشرف بالغتى لكن, انت اصلا جوة العربية , تقومى تفتحى الباب وتمرقى للكلب برة؟ ليه؟ عايزة تشوفى اسرع انتى ولا هو؟ بعدين راجلك المسكين ذنبه شنو عشان يشترى ليك شبشب جديد؟.ماتقفلى الباب والقزاز ويادار ما دخلك شر.
تقديرى.

أم أشرف بيني وبينك كدا انتي شبشبك دة أصلا كنتي لابسة ولا دي بس حركات جيش منك
أوريكم أنا القصة الحقيقية أساسا الزولة دي اكتشفت نفسها فجاه كدا انها ما لابسة الشبشب بتاعة يعني ناسية في البيت وقالت أبو أشرف دة ما حا افوت ليها مشكلة النسيان دي وقامت ألفت قصة الكلب دي الله اكون في عونك يا أبو أشرف والله اشفيك يا رانيا صغيرة وجاهلة ما تستاهلي

والله بختو ابواشرف يعني عندو الحلول ياريت لوعارف رقم تلفونه نخلي يربي حظيرة كلاب شفتي الحراشة دي كيف. والله ان زيك بخاف من الكلاب موت اها طلعنا درون... تسلمي ياراقية..؟؟؟؟

هههههههههههههههههه والله اسعدنى مروركم كلكم خاصة بت ابو فركة اصبرى لى انتى راجيك يوم وانتى الجن فايتك وين يا اختى تتزكرى لما سكتك الكديسة واتبرشتى علة وشك ولا نسيتى؟
لكن يا الرجال شايفاكم واقفين مع صاحبكم وواجعكم الشبشب اكتر من سته ، كتر خيركم

انا ما واجعنى الشبشب, لكن اشرحى لى حكاية انك تمرقى للكلب من العربية دى؟

بمناسبه الكلاب هاكي أحلا كاميره خفية

https://www.youtube.com/watch?v=kmxG0Yc5ssQ&feature=channel_page

https://www.youtube.com/watch?v=kmxG0Yc5ssQ

الشكر لكل من ساهم بالمرور على الموضوع لكن يا وابو عدى وحمو تجيبوا لى الكلاب فى المنتدى ؟ دايرين تطيروا قلبى ولا شنو؟