سلام يا الازرق سلام (شعر)]

سلام الهلال السوداني
محمد الحسن سالم حميد

الليلة دا يوم السودان

البلد الليلة هلالابى

النيل الأزرق نشوان

والأبيض أبيض ياأحبابى

يامشرّف كل الأتيام

فى يوم السعد الافريقى

يا مفرّح كبد الأيتام

باللعب البعد الموسيقى

يا هلال فى جبيرة سودانك

فى جبين الشعب الحبّوب

أبشر لاباشر وأقوانك

ياعريس السمر المحبوب

تعجبنى الرمية الزنجية

لى رأس الحربة النوبية

بى خفة لمسة بجاوية

تتسامى الهامة العربية

وتتناول نسمة صعيديّة

تسكن بى كلّ أريحيّة

ما بين الخصل البنيّة

وزغريدة تبق سودانية

لى أروع دخلة على النية

لى أروع دخلة هلالية

البحر الليلة هلالابى
المطر..

الحجر..

الترّابى

الشدر الشايل متكابى

الساقى عروقو الحطّابى

الشوقو عنقريب هبّابى

الشاقّى مروقوهلالابى

الوسّار ذوقوهلالابى

القمر البيتو قصاد بابى

حبيتو لانو هلالابى

وين تمشى الراضى على المابى

بالشمش الفوقوهلالابى

يا ليم يا الكورة وكت تبقى

أخلاق موروثة مع الخلقة

الغالب حاضنو المغلوب بمودة

وحنية ورقة

وجمهور بيشجع مصحوب

بالنغم الطيب والصفقة

الله ياشعب ياحبوب

ما أحلى الدخلة على المرقة

يا فريق بيطلع كم فرقة

يامارق بينا من الزنقة

وحدنا شبعنا من الفرقة

جددنا عشان نبقى وتبقى

ياريت الطالقة المنطلقة

وعلى بعض طلقة

ياريت يا أبونا يا ابو الحرقة

لو تقرا بياضك والزرقة

_________________

كالعادة عماد في الموعد مع المتألق هذه الايام ... مشكور ياعمدة

والله صدمتني ياابو نسب هلالابي عديل ولونك أحمر والله الايام دي نحن ساكتين وماعندنا اي تعليق ودي ايامكم والخيل الحرة بتجي في اللفة لكن بمستوانا دا صعب الوصول لدورة الأربعة لكن نتعشم ذلك.

أخ عبد الناصر كنا نتمناها مريخ هلال ومازال العشم قائم لكن مايحدث الأن عكس التوقعات

اولا اشرف انت عندك مية كلمة ؟ عبد الناصر متين بقى نسيبك؟ والهلال الرابطه فى راسك ده خليه ليوم القيدومة
ثانياُ قصيدتك روعة يا عماد الله يعلى هلالك كمان وكمان

ههههههه أم أشرف جات الرياضة .... وتقولي لي ما بحب الكورة تعال يا نزار اتفرج

والله يا اشرف لا بحب الكورة ولا بفهم فيها ولا عندى اى اتجاه رياضى او تشجيع لاى فريق - بس عجبتنى قصايد عماد
وشنو ابو النسب دى احنا مش اتفقنا؟

والله الايام دي ماشة معاكم عسل على قول طه سليمان .. ياهلالاب .. وان شاء الله ما تدور الدايرة عليكم .. اصلو الزمن دوار .. وربنا يكضب الشينة

ههههههه أم أشرف إنتي جيتي من فزورة محمد علاء مطششة ما لقيتي الحاء لسه

القال ابو النسب دا ع بد الناصر لي ع مــاد

بقول ليك ركزي رمضان لسه باقي ليه يومين الجرسة من بدري كدة

انا الهلال هلال العيد وانا الهلال ومجدي تليد
يديك العافية اخي عماد على الاختيار الموفق لمدح هلال الملايين وفوق فوق هلالنا فوق
وهارلك يا ابوعمر والله ما رضيناها ليكم والقادم احلي

البلد الليلة هلالابى

النيل الأزرق نشوان

والأبيض أبيض ياأحبابى

يامشرّف كل الأتيام

فى يوم السعد الافريقى

يا مفرّح كبد الأيتام

باللعب البعد الموسيقى

يا هلال فى جبيرة سودانك

فى جبين الشعب الحبّوب

أبشر لاباشر وأقوانك

ياعريس السمر المحبوب

تعجبنى الرمية الزنجية

لى رأس الحربة النوبية

بى خفة لمسة بجاوية

تتسامى الهامة العربية

وتتناول نسمة صعيديّة

تسكن بى كلّ أريحيّة

ما بين الخصل البنيّة

وزغريدة تبق سودانية

الاخ عبد الناصر هاردلك يا أبوعمر انا ما نسيت انك مريخابي على السكين .. بس اقول ليك لا مازدا ولا كارلوس البيرتو ما حا يعملو حاجة لانو فريقكم عاوز ترتي وتكوين جديد .. بس بالله عمر ما يجينا مريخاي خليه يكون مع الزعيم لانو مستقبل الكرة السودانية هلال وبس ...
ام اشرف يا راقية من ذوقك والله الحمد لله انو القصائد عجبتك وهذا لا يمنع ان نضمك لفائمة مشجعي الهلال بس ان شاء الله اشرف وأبوه هلالاب ..
الاخ الحبوب ... ان شاء الله تشوف ما يسرك من الهلال بس لو أخدنا الكأس ( بتنقلب) هههههههههههه.. والله نتمنى انو المريخ يتقدم فى هذه المنافسة الا انو الفرصة باتت ضعيفة ..

اخونا ود ابوعركي مشكور على المرور وظهرت هلاليتك كما يظهر هلالنا فى سابعة الشهر مبروووك للهلال وان شاء الله الكاس

قصيدة جميلة من شاعر كبير.
لاتسبقوا الاحداث ولا تفرحوا ولا نحزن فالمشوار لم ينتهى بعد وكله سوف يبقى ذكرى.
رمضان كريم.

ashrafbrkat كتب:: ههههههه أم أشرف إنتي جيتي من فزورة محمد علاء مطششة ما لقيتي الحاء لسه

القال ابو النسب دا ع بد الناصر لي ع مــاد

بقول ليك ركزي رمضان لسه باقي ليه يومين الجرسة من بدري كدة

اشرف لكن انحنا نلقاها من محمد علاء ولا من امه الحسدتنى فى نظرى الما بيشبه شوفها الطشاش طشاش ده - عشان كده لزت لينا ولدها