وصية لبنات حواء بخصوص العيد

الأيام دي طبعاً العيد على الأبواب ، أيام النقة والمشاكل – فالراجل أخلاقه في رأس نخرته وداير ليه أي سبب ويقوم في المرة .
أها تفادياً لهذه المشاكل عزيزتي حواء أوصيك بالآتي : -
1- قبل العيد باسبوعين تلاتة غيرى سياستك في التعامل مع الراجل وخليك زولة ظريفة ودمك خفيف - كتري من النكات والكشيم زي نار القصب و خلي سنونك برة دايماً ، وزعي ليه البسمات بسبب وبدون سبب ( فتبسمك في وجه أخيك صدقة ) . فما بالك اخيك هذا هو بعلك ؟
2- طلباته أوامر – يعني لو قال ليك جيبي لي كوز موية جيبي ليه جك عصير – لو قال ليك نفسي فى كباية شاي سادة أعمليها سيرمس شاي بلبن – باختصار اي طلب قولى ليه من العين دي قبل دي .
3- حسسيه بأنه أعظم زوج و أحسن أب ، وذلك باتباع الآتي :
أ – قولي ليه السنة دىاصلنا ما عايزين كسوة ، فانت والحمد لله ما محوجنا لحاجة ولو كسيتنا بس إلا كان زحمة للدولاب .
ب- فهميه انه أولاده معروفين أنهم أشيك و أقيف أطفال في الحي وده بشهادة نسوان الحلة كلهم .
أها المكنات دى طبعاً حتمشي فيه زى الترتيب ، وبراه تاني يوم حيديك قروش الكسوة ويقول ليك – عايزكم تلبسوا أحسن لبس وتكونوا أحسن ناس ، هو أنا عندى منو غيرك انتى والاولاد ؟؟
4- بعد ما تستلمي قروشك ، أها ابقى فالحة ونجيضة واقتصدي ، مافي داعي للتبزير ، رأفة بأبو العيال المسكين شقيان وتعبان يلقط فيها قرش قرش . يعنى مثلاً الاولاد بدل الجزم اشتري ليهم شباطة وبكده تكوني وفرتي حق الشرابات وشلتي من الراجل حمل كبير . كذلك انتى بعد ما تشتري تيابك وتي شيرتاتك والجيبات وما تنسي الشباشب والملايات و الستائر، فأنا بشوف انه ما في داعى للطرح ألبسي تيابك بطرحك القديمة و بطلي الاسراف أرتي للراجل ده شوية .
5- أوعك ثم حزارك تخليه يمشي معاك . وكان أصرعلى المشى فعليك بالآتي :
أولاً دخليه الدكاكين الرخيصة ذات الملابس الشينة وكل ما تسألوا من لبسة تقولي بري غالية نار بس ولا تقولي لا يا اخوي ما بتنفع معانا .وهكذا تلفلفي بيه 30 دكان لما يزهج وكرعينه يوجعنه ويحلف عليه بالطلاق بالتلاتة آخر دكان بس وتشتروا منه . وهذا هو المطلوب ومربط الفرس . خشي علي الدكان الفخم واقعدي بمزاج وانتي خالفة رجل علي رجل تختاري ، وطبعاً زولك بيكون عايز يتخارج فبيدفع وهو مغمض .
الحصة الجاية كيف تقلعي حق الخبيز والحلاوة من عيونه ، أقصد من جيوبه

نجرب يا ام اشرف نشوف بنفع والرجال الليلة حيتبسطوا منك

بينفع يا بت امي اسألي مجرب وبعدين معاك معلم ما تخافي بس بعدين كان نصر الدين هرشك اوعك تقولي ليه دى وصية ام اشرف انا برة

بينفع يا بت امي اسألي مجرب وبعدين معاك معلم ما تخافي بس بعدين كان نصر الدين هرشك اوعك تقولي ليه دى وصية ام اشرف انا برة

هوي المره دي بدور تورطك يا ام روان قالت ابندور كسوه السنه دي بزحم الدولاب وكان صدق كلامك وعمل حميل اها الحل شنو تقلبو علي الوش التاني

تسلمى يا ام اشرف بس الرجال كدا ما كشفو اللعبه
ما بصدقونا يا بيت امى كان ترسلي في الخاص وكدا

كلامك صاح يا خالى كان مقلبنى اقبل وين وهم ما بصدقوا تكشكر واكبوا ال ذوقة الخطة دى مانافعة نشوف غيرها ويا سكون زوجى قبيل قال لى ام اشرف كشفت خطتكم يعنى عرفناها الخطة ما بتمشى معانا

فعلاً كيدهن عظيم وكيد النساء خطير للغاية يا ام اشرف انت زكرتى اشياء خطيرة للغاية وفعلاً لو الراجل مشى معاك السوق يا بشتنك اوبشتنتيه يعنى يا غلبك او غلبتيه وبهذا الاسلوب الثعلبى ازكرتيه انت الفائزة ولكن لو كان زكى انتى الخسرانة ويا بنات حواء خليكن حنينات علينا وما تضغطن علينا كل المطلوب مجاب ليكن وللاولاد

اها يا ام اشرف
ايام حق الخبيز جات وانا راجية النصيحة منك

مشكورين الاعزاء ود الباشا - في سكون الليل - ام روان - اشرف - عبد الهادى وتوتة لكم التحية
توتة حق الخبيز والحلاوة برسله ليك فى رسالة خاصة انتى وبقية الاخوات عشان الرجال ديل ما يكشفوا خطتنا . اها يا اخوات بكرة اي واحدة حتلقى منى رسالة كافية وافية شافية - والما بتلقاها تدينى خبر

وبعد العيد الوصية حا يبقى شكلها كيف؟
هى هى هى.
كل سنة وانت طيبة.

وبعد العيد الوصية حا يبقى شكلها كيف؟
هى هى هى.
كل سنة وانت طيبة.


هههههههههههههههههههههههه

يا ناظم خليها بي النيه

النية واصلة, لكن نية ام اشرف دى منها مخافة.
هى هى.

سلام ياام اشرف 0وصيتك الاخيره
بينت نواياك 0والله يسترمن حق الخبيز
(ان كيدكن عظيم)