وإنتهت بالتعادل السلبي !!
أولاد عمنا ديل قدر ما قلنا ليهم دوري الابطال غير الكونفدرالية ما قادرين يفرقو لسّه.. برالمة وما عارفين روحهم برالمة.. انتو دخلوكم بي واسطة وللا شنو !! شكلكم كده شهادة عربية.. والغريبة ساقطين عربي !! أوع يكون واحد فيكم عمل بصمة في شهادة زول ناجح !!
الجماعة ديل مصرين علي انو السنة دي الاندية الكبيرة طلعت من البطولة الكبيرة زي الاهلي واسيك والنجم الساحلي مهدد بالخروج وطبعا بدخلوا ليك معاهم المريخ زي التقول شال الكاس السنة الفاتت !!
والغريبة حكاية توأمة الاهلي والنجم والمريخ واسيك دي منتشرة بين كل إعلاميي المريخ يعني حالة مرضية كده ظهرت بوضوح في عمود حسن محجوب أمس.. عندما قال في آخر بيت البكاء ( يطير الاهلي والنجم والمريخ ويبقي الهلال !!
ونحن ذاتنا ما عارفين المريخ دخل متين عشان يطير !!
الحمام الجانا طائر.. مرحب مغلوب الجزائر.. نوم عيني البقي لي سهر..
انتو اصلا ما عندكم علاقة بدوري الابطال عشان تكون عندكم علاقة بالاهلي ولا النجم ولا اسيك..
الأهلي القاهري بطل دوري الابطال وممثل أفريقيا في كاس العالم وصاحب أكبر عدد من البطولات والنجم الساحلي صاحب آخر بطولة لدوري الابطال وأسيك كان الموسم السابق والاسبق في دوري المجموعات !!
المريخ دا الدخلو شنو ؟؟
برالمة وعايزين يعملوا فيها سناير وخبرة كمان !!
مالكم ومال الاهلي ومالكم ومال أسيك ومالكم ومال النجم الساحلي.. يكون النجم قريبكم عشان الاسم !!
بالمناسبة يا ابراهيم عبدالله النجمة ذاتها كشعار للمريخ جات بعد سنوات طويلة من ميلاده..
نستغرب نحن من خروج الاهلي ونحزن عليه لأنه رفيق دربنا في البطولة الكبري ولأننا نتمني وجود الاهلي لأن مبارياتنا معه لها مذاق خاص ولأن الفوز عليه له طعم خاص وقد انتصرنا عليه في هذه البطولة في أرضه ووسط جمهوره في عام 2004 كما انتصرنا عليه في أرضنا موسم 2007..
والنجم الساحلي صديقنا والتقينا معه أكثر من مرة وعبس لنا الحظ في نصف النهائي عندما تفوق علينا ووصل للنهائي مع الاهلي القاهري.
مالكم إنتو ومال الاندية الكبيرة !!
يا ضلنا.. ناس الاهلي والنجم الساحلي واسيك لو قابلوكم في طيارة صدفة وعايزين يتونسوا معاكم بقولو ليكم الهلال كيف.. أخبارو شنو.. ما عندهم موضوع معاكم ..
برالمة وعينهم قوية.. دا الشوبير الخلاكم تقعوا من فوق.
زي خديجة البتعاين لي بيت الجيران.. في الاعلان
البوهية الأزرق بالابيض دي خطيرة جدا !!
خديجة بتعاين لي فوق لحدي ما وقعت في الواطة !!
ونحن بنعاين ونضحك في (شكلة) اعلام المريخ ومجلس المريخ !!
اللهم لا شماتة..
قالو ليك اعلام المريخ قال المجلس ما بعرف يكتب عربي !!
عقدة تاريخية مع اللغة العربية..
المسالمة دي زمان التعليم فيها كان بالانجليزي وللا شنو..
اعلام المريخ قال بيان المجلس كان مليان بالأخطاء الاملائية والنحوية !!
انتو لا قريتو لا باريتو القرو يا كافي البلا !!
إعلام المريخ قال المجلس ضيّع الشكوي !! معقولة !! ونحن قائلين مجدي شمس الدين الضيع الشكوي !
يعني رفضوها شكلاً عشان اشكال مجلس المريخ ما كانت عاجباهم !! والله (همد) دا لو جاني أنا ذاتو برفضو شكلا !! بس عندو تصريحات مبالغة !! عبدالمجيد عبدالرازق قال همد قال الرئيس ضعيف !! ممكن يكون الصوم أثر علي جمال يا عبدالمجيد !! في ناس كدا بتضعف في رمضان.. ما تشنو حملة علي همد دا ساكت.. نحن عندنا جارنا برضو (ضعف) في رمضان !!
مجلس المريخ قال اعلام المريخ سلبي وسبب في البلاوي الحصلت لينا.. علم الدين هاشم قال ليهم انتو لو عارفنو سلبي بتسمعوا كلامو لييييه ؟
المباراة بين مجلس المريخ والاعلام المريخي انتهت بالتعادل السلبي !!
مافي زول قدر يجيب قون..
وارغو كان لاعب مع الإعلام ؟!!
لكن لحدي ما المباراة انتهت ما كان عارف روحو شايت علي وين ؟!!!!
ابوجريشة عامل فيها لاعب قديم قال أنا براقب ليكم وارغو !!
جمال ضحك وقال ليهو انت لو بتراقب وارغو الحصل علينا دا كان حصل ؟!!
الغريبة الإعلام كان زعلان من التعادل.. ابراهيم عبدالله قال: ناس متوكل ديل مفروض نغلبهم ونحن مغمضين.. لكن اتضح انو بدرالدين الفاتح كان واقف مع المجلس عشان كدا كان بضيّع في الاقوان !!
المباراة أقيمت بدون جمهور !!
مش جمهور المريخ مقاطع أخبار المجلس وزعلان من الإعلام !!
والزعلان كلمو يقع الخزان كلمو..
خزان سنار محجوز لي همد !
خزان جبل أولياء محجوز لابراهومة..
خزان خشم القربة محجوز لي حافظ !! اشمعنا حافظ يعني ؟ عشان شبكتو قربة مقدودة !!
نفسي أعرف مشكلة المريخ في حافظ وللا في أكرم ؟ في الشغيل وللا في لاسانا ؟ في بلة جابر وللا في الزومة ؟ في النيجيرين زي ما بقول أحمد محمد أحمد وللا في السودانيين زي ما بقول عبد الباقي شيخ ادريس !! وللا في الهلالاب الفي فريق المريخ زي ما بتقول المعارضة !!
يا جمال انت ما تخلي المعارضة دي تحكم !!
جمال قال ليهم: لو في رئيس بضمن ليهو المريخ ما بتغلب او يتعادل ممكن هو يستقيل !!
واحد ثقيل قال ليهو: نحن علي الأقل بنضمن ليك إنو المريخ ما طوااااااالي بياخد تلاتة !!
اتلتكم !!
موضوع: اولاد عمنا ديل مالن 
الأربعاء سبتمبر 16, 2009 5:35 pm
فنانة الجماهير الاولي ندي القلعة انا هلالابية.. ومـا داسـاها
