شخصيات لامعة (4) راجل المرتين

راجل المرتين راجل شجاع والله واحييه على اقدامه وجراءته باقدامه على مثل هذه الخطوة , بالجد خطوة ما ساهلة ولا هينة ، لانه فتح على نفسه كم جبهة من الحرب و النيران ، وهو سلفاً عارف ( إن كيدهن عظيم )
فلو هو عارف انه بيقدر على العدل بين زوجاته ما فى مشكلة على الاقل من جهته هو تجاه شرع الله ، ومسالله ربه – لكن تبقى المشاكل بين نسوانه ، ومافى مرة على وجه الارض دى بتحمل الضر وكضابة والله البتقول ليك رضيانة و لا هامينى .
كدى نرجع لنجم الموضوع ، فصاحبنا ايامه الاولى من عرسه التانى بيكون فرحان و آخر انبساطة وما عارف الراجيه ، فاول ما يرجع من شهر العسل التانى يلقى ام الاولاد منتظراه بلستة من الطلبات ما أنزل الله بها من سلطان ، طلبات فى شيلتها ما جابوهن ليها ، تعرس تانى لتلاتة .
بعد داك تبدأ المنافسة بين الضرتين , فاى حاجة جابها للولى لازم التانية يجيب ليها احسن منها والعكس تماماً ،مش كده وبس حتى فى الولادة دى بيتنافسن ويصادف بطلنا الهمام يعمل سمايتين فى الشهر الواحد ، و نلاحظ الزوجة الاولى تجند أولادها فى صفها ويشتغلوا طابور خامس على أبوهم ‘ والتجنيد ده سواء كان اجبارى او برضاهم ما من مصلحة الراجل ، ففى الفترة دى يكتر مرض الاولاد ( كان بالصح ولا بالكضب ) وما يتبع المرض من كشف وفحوصات وأدوية و فواكه والذى منه ، ده غير الحرب الكلامية والفعلية ووجع الراس والنقة – و ده كله بيطول شرحه عشان كده نسيبه لوقت تانى وما فى داعى نزحمكم بيه .
اضرب ليكم بس مثل صغير برمضان الجايينا ده
فلو فرضنا انه الاولى عندها تلاتة اطفال والتانية عندها اتنين ، وكل واحدة عايزة مستلزمات رمضان من آبرى ورقاق و بلح وشوال سكر وووووووو . كويس معاك؟ اها دى ميزانيتها كيف؟ يجى بعدها العيد ولاحظ خمسة أطفال وبالميت اى واحد عايز لبستين وجزمة دى على أسوأ الفروض والامهات عايزات التياب وتبعاتها من شبابشب و لبسات واكسسوارات ، وزكاة الفطر حتكون لتمانية افراد ، بعد داك حلاوة العيد والخبايز وغير انه كل واحدة عايزة تسافر لاهلها سواء فى ايام العيد او بعدها وأكيد ما حتمشى يدها فاضية – اها لسه راجل السرور ما جرّ نفسه من عيد رمضان جاه عيد الضحية والخرفان وما أدراك من خرفان و موضوع طويييييييييييييييييييييييييييييييييل
على العموم راجل المرتين تعبان وشقيان وريقه ناشف و موزع ومزعزع و مشلهت وذهنه شارد وعقله مشغول و التسويها بأيدك تغلب اجاويدك اللهم لا شماتة لكن الواحد يفكر الف مرة قبل ما يقدم على خطوة خطيرة زى دى وربنا يكون فى عونه هو الوداه يتشالق شنو - حالتى بس عرضت ليكم حالته المادية بتكون كيف ولو تطرقت لحياته من كل الجوانب (الاجتماعية ، العاطفية الاسرية ..........الخ) لشاب شعر راسكم

[quote="ام اشرف"]راجل المرتين راجل شجاع والله واحييه على اقدامه وجراءته باقدامه على مثل هذه الخطوة , بالجد خطوة ما ساهلة ولا هينه .

اسبتى على كلامك ده وما تبطبطى ويا نزار دى دعوه ليك مفتوحه للزواج مره تانيه ههههههههههههه

هوى يا ابو عدى منو القال ليك ابو اشرف حيتجرأ ويعمل خطوة زى دى ، انا الكلام ده بقوله ساي مجرد نظرية طوالى عملته جد؟ انت لو عندك الجراءة اعملها ونحن من المتفرجين ان شاء الله - تحياتى لام عدى

عليك الله المجنون دا منو البفكر يتزوج تاني الا واحد امه داعية عليه زي ماقلتي.واديك معلومة صغيرة يا ام اشرف نحنا ناس الدبيبة تكاد تكون معدومة عادة الزواج للمرة الثانية يعني المراة يا دفنتك يادفنتها . اها رايك شنو في وفاء أكثر من كدا.

ابو عدى بطبطة شنو قلت ليك أنا بتاعة تنظير ساى ما تصدق البقوله ده
بختها يا عبد الناصر البتناسب ناس الدبيبة ترقد قفا وهى مطمئنة من حكاية الضردى
كويس يا مضوى انك زكرت الاخوات ببوكيهات الورد وانا جهزت مزهرياتى وحاتك ولا وردة ما جاتنى عاملات مطنشات
والله يا اشرف ضحكتنى فى وصف حالة راجل المرتين واظن اى واحد لو عنده مجرد فكرة بعد كلامك ده حتطير ليه فى راسه
سعدت بمروركم

والله كلامك صاح ياأم أشرف أنا شخصيا ماخضت التجربة لسة لكن لو اتوفرت لي المادة مالو
مثنى وثلاث ورباع ورسولنا الكريم قال تكاثروا فإني مفاخر بكم الأمم يوم القيامة أنا بكتب في الكلام ده ومتأكد إنو ناس الدبيبة خلاص( صنفوني)لكن برضو تعدد الزوجات ماهو حرام بل العيب هو كبت النفس وده مردوده أخطر على الزوجة الأولى من ناحية النتائج
طبعا الرجال شموني قبل النسوان ياجماعة دي وجهة نظر أيدها ديننا الحنيف ولوكانت مضرة كان الاسلام نهى عنها مثل الخمر ولكم العتبي
تقبلي المرور

يا ام اشرف نحن متطمئنين وسادين اضن من طينة والتانية من عجينة لان قانون الدبيبة دا مية المية معانة مافى مرتين ولو عندك بت طوالى بنعرسه ليك بس نومى قفة(( ذى مابقولو اهلنا الكبار راجل المرتين ارنب بين كلبين))وتسلمى

هى واحدة الله يجيبها ويتممها على خير خليك من التانية.

صدق أولا تصدق عندنا راجل في الشقلةمعرس أربعة
والرابعة عرسها يوم عقد ولدو أما حكاية اتنين دي عندنا كتيرة مابتتحسب

العوج الدرب الفى البر عوام والله احنا بنتمنى ليك ربنا يقدرك لكن بعدين براك بتشوف النتائج
بت الدليجة انا بتى اللسه ما شرفت خطبتها لاشرف بركات على بال ما يكون نفسه هى بتكون جاهزة . شفتينى فالحة كيف؟ نجهذالعريس فى الاول وبعدين البت هينة
الله يتمم على خير يا ناظم ونفرح بجديدك قول آمين
أبا زر يا نصير النساء مل تسمع كلام العوج الدرب ده .

ابا زر صورتك ( وراء كل رجل عظيم امرأة ) - سميها ( على يد كل امرأة عظيمة رجل)

abazer arbab كتب:

ياولدنا عوج الدرب كلامك صاح فى الشرع
لكن اردو عليك كيف حتى لو مروق وعندك مال قارون وعندك العطف وعاجبك ست الحسن والحسان يقولوا ليك تور تقول احلبوووووووووووووو
برضوووووووووووووووووو واحدة بس لا غير لى اسع ماتولد البعرس 22222222222222222222222

اباذر نحن بنتكلم بس لكن وقت الجد عشان الموضوع يسخن هي الواحدة انا لسة مالامي فيها

طيب مادام واحدة ما لامى فيها مالك يا عوج الدرب
ان شاء الله وببركة هذا الشهر الفضيل رمضان الجاى مع العروس قول امين

لكن يا ام اشرف ادبتى الرجال وطيرتيهم من العرسة التانية وبينى وبينك كان لقوا القريشات بعرسوا لكن الاعرج ضاربهم واحنا نسوان الدبيبة قانونا مريحنا جدا الوضعوا ده ما قصر معانا

عشان عارفاهم يا ام روان كان لقوا القريشات بيعرسوا - قلت النعمل ليهم ارهاب وحرق اعصاب عشان الواحد براه يقول التوبة يا حبوبة

ام اشرف ليك التحية ورمضان كريم

انا واحد من الناس اتزوج اربعة

واكان في دسته كمان هاهاهاهاها

مونى الله يقدرك كدى فى الاول عرس الاولى بعد داك ققرر

عاد جنس فصاحة - والقادر يحنن ضنب حماره