يا بنيتي حسابك

تذكير بمساهمة فاتح الموضوع :

أمس سمعت بالصدفة أغنية بصوت المغنى الشعبي ابراهيم موسي أبّا بلهجة أهلنا في غرب السودان وبالتحديد منطقة درافور . الاغنية غرضها جميل وموضوعها أجمل فهى وصية اب لابنته يعلمها كيف تعامل زوجها وتحافظ على بيتها .
لحد هنا كويسين وما قلنا حاجة وماله بالعكس كتر خيره وبارك الله فيه ، ولفتة حلوة وجميلة منه . لكن لما تسمع الاغنية تحتار وتحتاس – بالجد فيها وصايا كده مغصتنى مغصة ووجعتنى وجع .
يعني مثلاً بيقول لبته : ( الراجل كان ما ناداك ما تمشي تلحقيه ) !!!! ده كلام ده ؟؟؟ كيفن يعني ما ألحقه ؟؟ هسه كان نسي حاجة وراه ، ولا قول إن شاء الله عيان ونسي حبوبه ما أجري ألحقهن ليه ؟؟؟ و كان نسي يديني المصاريف اها انا اتصرف كيف لو ما لحقته خاصة فى وجود الاولاد .
وتاني بيقول ليها ( الكورة ام قعر تحت عنقريبه ختيه ) مش كلام غريب ؟ وين هنا الالفة والمودة وين الحنان والمحبة ؟ انت مادام بتوصي بنتك علي المعاملة السمحة - دي هسه وصية ليك؟ ليه جريو هو ولا كديسة عشان اخت ليه اكله تحت العنقريب – بدل ما تقول ليها حضري أكلك وجهزي صينيتك وختى تربيزتك وكراسيك عشان تاكلوا مع بعض تقول ليها تحت عنقريبه ختيه ؟؟؟!! ليه الجفا ده وبالمناسبة دي إهانة و عدم احترام بالجد .فاللقمة لا تحلو إلا بمشاركة الزوجين .
برضه من الوصايا بيقول ليها الراجل لو ما جاب قروش ما تسأليه !!! وده طبعا مستحيل ما اسأله كيف مش يمكن بيمر بضايقة مالية ومحتاج وقفتى معاه او يمكن اتفصل من شغله وعايز كلمة تواسيه او بقي يصرف قروشه على الفارغة والمقدودة وهنا دورى انى اوجهه وارشده.
في الحقيقة الاغنية فيها اكتر من وصية جميلة وكتير من الوصايا السالبة والبتصور الراجل ده وكأنه دكتاتور وطاغية على أهل بيته ومتناسي اللين والمعاملة السمحة الاوصي بيها الاسلام.
وصايا تفتقد لروح التحاور والمشاركة بين الزوجين – وحياتهم اسمها (حياة زوجية ) مش فردية. وإلا ما في داعى لتسمية اى من الطرفين بشريك الحياة . هو انا لو ما كلمته وشاركته الكبيرة والصغير فايدة شراكتي لحياته شنو ؟ ولا انا غلطانة

العرف عزه مستريح

اها شنو ليك

شيشكم يا اهلنا , علي ام اشرف

والله يا ام اشرف حكايتك عجيبة زول بوصى فى بتو, انتى المزعلك شنو؟
غايتو جنس حشر, يا حشرية هى هى.

هوووووى يا ناظم لاحشرية ام اشرف ولاحاجة هو مش الاغنية فى الرادى معناها للناس كلهم يعنى نقول راينا بصراحة كان عندكم شغلة امشوا اقضوها

اها جنس دة اسموهو شنو؟ اسى انا بتكلم مع ام اشرف انتى المزعلك شنو؟
غايتو جنس ح.....
هى هى هى.

هيى انت ما عارف انا وام اشرف وااااااااحد بعدين هى نايمة وانا لازم ادافع عنها لانى صاحية ليكم يا رجال المنتدى الحقارين

hahahahaha ok
i hope that i have some-one who defends me like that
lool

اختى ام اشرف سلام
كثيرا ما استمعت للاغنية براديو البيت السودانى وانا من المدمنين للاستماع الية وكثيرا ما ضحكت لسماعى لها لما فيها من كلمات فكاهية
وافتكر انها صيغت حسب مفاهيم وعادات قديمة لم تعد مقبولة فى وقتنا الحاضركمان عادات اهل كردفان يمكن يكون فيها شوية اختلاف عن اهل الوسط وهم بفتكرو انو دا احترام للرجل
يعنى زمان كان الحبوبات الواحدة فيعم ما بتنادى زوجها بى اسمو ولا بتاكل معاهو فى مكان واحد
وماتلحقيهو يعنى ما تتخففى ليهو وختى ليهو كوررة تحت عنقريبو هم بفتكرو فيها شى من التمييز والتخصيص للزوج يعنى حاجتك براك ما مع باقى الناس ديل
عموما رغم تغيير كتير من المفاهيم الواردة فى الاغنية عن الوقت الحالى الا انى بلاقيها فكاهية جدا وزى ما قلتى برضو فيها قيم جميلة جدا

يا ناس باركوىىىىىىىىىىىى الحكاية شنو رمضان كريم ما تنفشوا فى النسوان الحالة انتو صبيان ليس ما جربتوا الحياة حق السك والخط تحت العنقرب قولواااااااااااااااااااا يا لطيف

الاغنية كما ذكرت الاخت توتة بها الكثير من المضامين الجميلة والتى تحتاجها فتاة اليوم مع بعض التحديث من حياة الامس واليوم وابدا ما فيها شئ لا يتناسب كم فهمت ام اشرف وعلى فكرة الوصية من ام لبنتها وليست من الاب وماممكن الرجال ينزلو لمرحلةيوصو بناتهم لأن ذلك من صميم عمل الام وحتى الاذاعة التى تبث هذه الاغنية دائما ماتجيب صوت حبوبة تؤكد فى هذه الوصاية لبنتها عموما يا بنات المنتدى ابقو عشرة على الوصية ويا اشرف وامو شايفكم بتكتبو الموضوع والباقى بتموهو ونسة مع بعض افتحو بوست للونسة ونخنا ذاتنا بنتونس معاكم بس البوست الفيهو الموضوع ماتفقدوهو مضمونو وتطلعونا بره الشبكة ويا ام اشرف حسابك ذى ما فى الوصية مع خالص ودى

الاخوات توتة وعلياببية تحياتى لكم ومروركم يسعد
الاخ ود عدلان رمضان كريم ومشكور والله علي التنبيه فعلا الونسة ليها مكانها وبتبعدنا عن الموضوع الاصلي لك التحايا - تسلم

بدون تعليق

برضو مصر على رأيي يا اشرف عشان ما نستفيد من الموضوع نناقشو اكتر ونطلع منو بى نتائج ترسخ مفاهيم لكى تعم الفائده اما الونسه نفتح ليها بوست خاص والا المنتدى يفقد معناهو وارجو ان لا تكرس لهذا الفكر عشان الواحد اصلا حاصل ليهو طمام بطن بسبب قلة المواضيع ووجود بعض المواضيع الغير مجدية نحن كل ما ندخل المنتدى بنلاقى مواضيع معينة فيها الكتابة والردود ومعظمها فطير وغير مجدى وبرجع بيتو وهو متضايق وحبه حبه يمكن يفارق المنتدى ام اشرف دائما تتعرض لمواضيع جميلة لكن لا تكون هناك مناقاشات وانما ونسة عامة ونطلع برة الشبكة وقع ليك ولا اعيدو ليك مع خاص التحايا يابن خالى يا مختفى ورمضان كرييييييييييييييييييييييييييييييييييييييييييييييييييييييم عليك