عايزين نتعرف على اعمامنا وخالاتنا

تذكير بمساهمة فاتح الموضوع :

عايزين نتعرف على اعمامنا و
خالاتنا
حافتح بوست عبارة عن لقاء كل مرة مع عضو او عضوة في المنتدى لكي نتعرف عليهم نحن الصغار ونتواصل معهم أول عضو اخترته عمو مصعب الشيخ استعد يا عمو مصعب للكرسي الساخن بتاع الأطفال اليك الأسئلة
الإسم؟؟
الهواية؟؟
أمنية لنفسك؟؟
أمنية للمنتدى؟؟
أمنية للدبيبة؟؟
أمنية للسودان؟؟
مكان الإقامة؟؟
متى آخر مرة زرت فيها السودان؟؟
لونك المفضل؟؟
أكلتك المفضلة؟؟
من هم أصدقائك المقربون إليك؟؟
حدثنا عن ذكريات في الدبيبة؟؟
ما أكثر لعبة تحبها عندما كنت صغير؟؟
عمو مصعب انت هلالابي وللا مريخابي؟؟
هل لعبت في فريق الدبيبة ؟؟
خلاص يا عمو مصعب كفاك وكلمة أخيرة لصغار المنتدى؟؟
(عمر)

دا كلامك انت لسة شوفتة البرى بس استعد لى وشكراعلى المرور الجميل

الاخت بت الدليجة سلامات وكيف الامر والاميرات والله ماقصرتى معانا مافى شك انتى بتحبى قريتك حب جم وايام الطفولة مافى زيها ولكن ناس المنتدى حارين وكواين الزول لو ماصبر واستحمل الهظار وحتى المافى محلوا واقول دى من محاسن الغربة كلنا متغربين عن الاهل والوطن ربنا يرجعنا سالمين وعبر هزة الرسالة اترحم ببركة هذا الشهر الكريم على روح العم الدميج ويارب تحقق امنتك وتزورى قبر الحبيب المصطفى وقبر ابيك هذة دعوة صائم

اباذر وينك مختفى لو فكيت اخرى فى مراحل الدراسة ما حتكفى الصفحة واحنا كلنا زيك مستنين خالو جلال

عمو جلال وينك احنا مستنينك يلا تعال وما تزعلنا منك

متعه يا رانيا مافي بري ولا حاجه, مرحوم بقول سااااااااي ,تحياتي للاسره

احنا مستنين وكنت عايزة عمير يكتب اسئلة اكتر من كده لكن سبقنى ونزل اللقاء لكن لو فى اى زول عندو سؤال لخالو جلال البوست مفتوح وانا بقدم الدعوة دى بالنيابة عن ولدى

في الانتظار ياهندسه , لو ممكن تنزل لنا صوره حديثه يا هندسه, تحياتي حبيبنا جلال

حبيبي عمر كيف حالك وانا متاسف جدا لاني تاخرت عليك بس لاني ما انتبهت لنداءك للتعرف علي.. معليش وها انذا جاهز للاجابة علي كل اسئلتك الرائعة والظريفة وخوض غمارالفكرة الحلوة المشرقة التي ابتدعتها رغم اني انتبهت لنداءك في وقت متاخر جدا من الليل ولكن امرك مطاع وانت غالي عشان كده لازم استجيب لنداءك طالما وصلني .. وانا شايف انو المستقبل قدامك وباين عليك حا تكون ذو شأن عظيم ان شاء الله .. ويلا نبدأ بـ :
وعليكم السلام ورحمة الله وبركاته
الاسم : جلال عبدالحميد عمر احمد
العمر : انا قدر بابا ونحنا اولاد دفعة واحدة دخلنا المدرسة الابتدائية مع بعض وكنا مع بعض حتي الصف السادس يعني اسال بابا عن عمرو فتجده نفس عمري انا وبالمناسبة بابا مرة زرّاهو ناظر المدرسة إبراهيم في الطابور .. كنا اظننا اتشعلقنا في البص او عملنا شقاوة اطفال ما متذكر بالضبط ايه الحصل لكن في الطابور كان بيسالونا عملتوا كده ليه .. يلا لما سالو بابا نصر الدين .. قام حلف لي الناظر وقاليهو وحات كتاب الله انا ما عملت كده يلا الناظر قاليهو وحات كتاب الله ولا وحات كتاب المطالعة .. ها ها ها ها ها ها ها ها

الهواية: انا هواياتي كثيرة جدا مثلا انا لما كنت صغير زيك كده كنت بحب الرسم جدا وكنت رسام جدا- وكنت بقلد صناعة اللعبات الكان بيشتريها لي ابوي زي العربات الصغيرة والطيارات الخ .. ونجحت في تصميم طائرة صغيرة جعلتها تحلق في الهواء بواسطة محرك صغير .. ثم بدات اعزف علي آلة الميلودكا وهي صفارة صغيرة فيها ازرار سوداء وبيضاء زي الاكورديون ثم تعلمت العزف علي الاكورديون نفسه.. ولما كبرت شوية بقيت احب التصوير الفوتغرافي ولما دخلت الكهربة في الدبيبة بقيت احب شغل الكهربا وتصليح الاجهزة الالكترونيه رغم صغر سني ولما كبرت اكثر دخلت معهد الكليات التكنلوجية ودرست الكهربا العامة وهندسة الراديو والتلفزيون ثم الدوائر الالكترونية - يلا بعد داك بقيت اعزف مع الفنانين في مركز شباب السجانه اضافة الي اني كنت بلعب الكرة الطايرة والباسكت بول كهواية فقط - ثم دخلت قصر الشباب والاطفال ودرست الة البيانو علي يد الكوريين والاستاذة وداد عبدالحميد ثم انتقلت الي معهد الموسيقي والمسرح وكان في العمارات شارع 61 واكملت دراسة الموسيقي هناك وفي نفس الوقت كنت بعزف مع كل الفنانين تقريبا مرة اكورديون ومرة اورغن - بعد داك سافرت في رحلة فنيه مع الفنان عبدالعزيز المبارك الي السعودية ثم قطر ثم الامارات واستقريت في الامارات حيث كنت اعمل مدرسا في مكان قريب من مدرسة بابا نصرالدين وبابا نصر الدين كان طوالي يجينا في بيتنا ثم تحولت للتصوير الفيديوي وجبت الكاميرا الصورنا بيها كل الاعراس بتاعة الناس في الدبيبة .. يلا بعد داك رجعت السودان ودخلت جامعة جوبا ودرست هندسة الكمبيوتر والشبكات وتصميم البرامج والسايتات يعني زي السايت الحلو الفيهو المنتدي بتاعنا دا .. ثم بدات التصميم ثلاثي الابعاد (3D) بالكمبيوتر ثم تدريسه وعمل الرسوم المتحركة به ..ثم درست في ايرلندا في نفس المجال بصورة اوسع كما درست ايضا الاخراج والمونتاج وعمل الفيديو كلب .. وانا حتي وقت قريب كنت اعمل معلم للكبار وللاطفال الحلوين زيك كدا بعلمهم اللغة العربية والتجويد في مدرسة خاصة في ايرلندا
الحاجة الما بيعرفوها الناس هي اني مثلي مثل كل اهلي في الدبيبة بغني إضافة الي اني بعزف يعني زي حيدر بورسودان والحقيقة انا بغني اغاني كبيرة وصبعة لي وردي ومصطفي سيد احمد وابراهيم عوض وزيدان و كل زملائي في المجال عارفين ذلك الا اني كنت متحفظ شوية في الدبيبة وطبعا الان توقفت تماما عن ذلك

ذكريات الطفولة: انا طبعا لي ذكريات جميلة ورائعة في الدبيبة الحبيبة مع بابا نصر الدين وكل اصحابنا كنا في الدبيبة نلعب قدام بيتنا يعني في الفسحة بتاعة الجامع كنا نلعب حرت - الرمة وحراسها - شليل وين راح اكلو التمساح وخلي بابا يشرح ليك كيف اللعبة دي وكل اللعبات الاخري - برضو كنا بنلعب الدافوري بي كرة الشراب - وايام الخريف كانت عندنا لعبات اخري زي الطاب - والسيجة الخ .. وكنا كمان لما تصب المطرة نغني ليها ونقول
يامطيرة صبي لينا فوق عينينا ونخرج كلنا مع بعض الي الخلاء عشان نقتل العقارب والثعابين والفئران التي تخرج بسبب المطر .. بعدين كنا بنجيب الجالونات ونركب فيها السلك النملي ونعمل بيها ربابات (جمع ربابة ) ونعزف عليها اغاني اييييييييييك حاجات كثيرة

شعوري في الغربة: شعور مؤلم جدا خصوصا وان غربتي طالت وانا بعيد من الدبيبة الحبيية وبعيد من اهلي والحلوين الصغار زييكم يعني ياعمر انا كنت بتمني اكون هناك في الدبيبة عشان اشوفك انت وروان وبنتي اشواق وكل الاطفال الحلوين زيك كدا لكن الان بسبب الغربة انا محروم منكم ومن بنتي الحلوة اشواق الصغيرة والتي كتبت ليها اغنيه حلوة اذكر ليك منها بعض الابيات وهي:
حبيبتي الصغيرة اصبحت كبيرة
حلــوة وظريفــة ودائما نظيفــة
تساءل امـها اسئــلــة كثــيــرة
وامـهـا تجيبها في جمل يسيرة
تناسب فهمها ولاتسبـب حيرة

إن شاء الله لما ارجع حا احفظها ليكم وتغنوها كلكم مع بعض واعزفها معاكم بالاورغن ..
شعوري في الدبيبة: شعور بالعزة وبالمحبة شعور بالامان بين اهل حلوين وحنينين كل واحد فيهم عمي وعمتي واخوي واختي وابني وبنتي كنت اتمني ان اكون هناك لاشارك الناس في كل شئ ولكن ارادة الله شاءت ان اكون بعيدا لسنوات طويلة ولكن دائما قلبي هناك

اصدقائي المقربون : كل زول في الدبيبة صديقي واخوي واختي ولكن بالتاكيد هناك ظروف اخري تقوي العلاقة ببعض الاخوان اكثر من غيرهم مثلا ابناء دفعتي في المدرسة مثل بابا نصر الدين لاننا كنا قريبين من بعض في الامارات - وتوفيق احمد عثمان بسبب العمل - وعزالدين احمد المصطفي بسبب الموسيقي - والمرحوم محمد مضوي يعزني جدا - والمرحوم عبدالحميد الامين الذي كان يحب العزف وياتي للاستماع اليه.. الحقيقة كل الناس اصدقائي وكلهم مقربون ولا يتسع المجال لذكرهم جميعا

اللعب في فريق الدبيبة: للاسف لم العب في فريق الدبيبة لاني ما كنت لعّاب في كرة القدم ولكن بسبب طولي الفارع كنت اجيد لعب الباسكت بول والطايرة وكان ذلك في مركز شباب السجانه كما ذكرت

دولة احب زيارتها: بالتاكيد الامارات لاني لي فيها ذكريات جميلة ورائعة نفسي اخد اولادي والف معاهم علي كل حته عشنا فيها خصوصا واني كنت استاذ ولذلك تنقلت بين عدة مدارس مثل مدارس ابوظبي وغياثي وبديع زايد والمنامه ووالخ ..

لو عندي كورة حلو مر: حا اسقي منها نفسي اول حاجة مش لاني اناني وانما لانو هنا في ايرلندا ما عندنا حلو مر ولذلك مشتاق ليهو شديد والناس هناك ما محتاجنو لكن اي شراب تاني كنت اول حاجة حا اسقيك منو انت ياعمر لانك شاطر وفنان وبعدين اسقي منو بنتي اشواق التي لم ارها حتي الان

اي فريق اشجع: انا طبعا انا مريخابي علي السكين ولكن لست متعصب يعني انا مريخابي لكن لو مثلا الهلال لاعب مع فريق اجنبي فانا بلا شك اشجع الهلال بلا اي تحفظ ولا ارضي له الخسارة ابدا وكما هو الحال في اللعبة القادمة اليومين الجايات ديل مثلا اري ان يسمح المريخ للهلال بالفوز لان فرصة الهلال افضل من المريخ بس خايفين الهلالاب يفهمونا غلط ويمسكوها لينا زلة لو خليناهم يغلبونا

اشكرك حبيبي علي الفرصة الجميلة زيك والمساحة التي اتحتها لي في جنتك الرائعة (عايزين نتعرف علي اعمامنا) واتمني ان اكون قد اجبت علي كل اسئلتك بوضوح وسهولة ولا زلت علي استعداد لاجابة اي اسئلة ربما تطرأ علي ذهنك المتفتح وانا مبسوط منك جدا لانك انت شاطر وشجاع وجريئ ورائع وطموح واتوقع ليك مستقبل زاهر (مش زاهر مديرنا)
ومرة تانية بعتذر لاني تاخرت عليك وعلي الناس وبعتذر لاني طولت بس لانو ماما قالت في اسئلة كانت عايزة تطرحها وما لحقت لذلك حاولت اجاوب باسهاب فربما اصيب واجيب علي ما كانت تود ان تطرحه.

بالنسبة للصورة ان شاء الله بكرة احاول انزل ليكم صورة بس حضروا مشاعركم لرؤية مغايرة للتي عهدتوها اما بالنسبة للاخ مضوي ساحاول ان اخرج بدلة وانفضها من الغبار عشان اتصور بيها ولكن من غير كرفته واتمني ان تكون الصورة لائقة بالمنتدي وانتو كمان بعتذر ليكم علي التاخير واؤكد اني علي استعداد للاجابة علي اي اسئلة تطرأ بلا اي حرج

اخي اباذر تحياتي لك ولام العيال والعيال واشكرك علي مشاعرك النبيلة الدافئة ودمت لي نعم الاخ دوما وبالمناسبة اتذكرت ليك طرفة عملتها معاي حا انزلها اليوم او غدا في بوست طرايف الحميدية خلي بالك منها

لقاء جميل وكلام يفيض حنية!!!!!!!!

ربنا يرد غربتك ويجمعك مع اهلك واحبابك في ساعة خير ان شاءالله.

دائما الابداع اجده فى كلماتك واليوم وجدت الحنية والقلب الكبير والروعة وقمة الجمال اخذتنا معك فى رحلة جميلة الامارات ايرلندا الدبيبة كتبت كل ما كان نفسى اسالك عنو الله احفظك واحفظ طموحاتك فانت موهوب وطموح ومجتهد ومثابر وصبور ومن دون ان نشعر سكبنا دموعنا انا ونصر لقد اثرت كلماتك الرقيقة فينا وتذكر نصر الذكريات التى حكى لى كثيرا عنها
وكم كنت اتمنى ان اقابلك فى الامارات واكون بجواركم ربنا يجمعنا فى ساعة خير وربنا يجمعك باشواق وتبل شوقك فيها وتشبع منها ودمت لنا

تحياتي لكم احبابي محمد وام روان وابوروان وكم انا سعيد بتواصلكم .. الحمدلله علي ذلك خلو بالكم من عمر باين عليهو ان ذو شان عظيم ان شاء الله

التحية لك أخي الموسوعة أبو محمد وقد عدت بنا من خلال لقاء الإبن عمر الى ذكريات
ايام جميلة وقد أضاف هذا اللقاء القصير الى ابني عمر الكثير من الخبرات ستكون نبراساً يضئ طريقه ولكن بقدر ما سعدت باللقاء يقدر ما اعتصرني الألم وسالت دموعي لانني أب وأعرف مدى شوق الأب لأبنائه فأسأل الله أن يجمعك بأشواق و أخوانها كما تذكرت أيام الحنية
وداركم العامرة فأنت وحرمكم المصون أهل كرم أتمنى أن نراك قريباً في الامارات ومرة أخرى أشكرك و تقبل خالص أشواقي وأمنياتي الطيبة لك

اشكرك اخي نصر الدين وانا باذن الله ساكون قريبا في السودان .. وقول لي عمر بسببك وعشانك الليلة قبلت انزل صورتي في المنتدي عشان تعرف عمك وشكلو يعني زي ما طلبت تماما مع اني كنت متحفظ علي الصورة من قبل عشان ما اعمل احباط للناس ..ودا برضو عشان خاطر كربر وقبل كدا مضوي برضو تحياتي لكم جميعا وهاهي صورتي اليوم كما ترون رجل هده الدهر وخط الشيب راسه

زي ما بقولو الشيب وقار وصدقني ويدون مجاملة ما زلت تحتفظ بنضارة الشباب وما انت
براك كلنا حصلناك والحمد لله على نعمة الدين أولاً والصحة والعافية ثانياً متعك الله بالصحة

اشكرك اخي نصر الدين ودا كله بي بركة الصغير عمر